近排新老細上任, 仲未習慣佢嘅工作模式...
加上有個Project喺手, 佔據咗大部份嘅工作時間, 工作忙, 無空餘時間寫Blog...

3月14日係普施健「沙田10K」河畔賽2010, 搭頭班86巴士到恒生商學書院...
個集合地點就喺巴士站㤔近, 好方便...

七點左右已經可以攞號碼布, 唔駛等到七點半, 安排唔錯...

影完相及換衫鞋後, 拉筋熱身, 跟住慣例同阿輝Jog一段路...
今次揀咗一段上斜路慢Jog, 都算幾特別...
Jog完仲有時間剩, 可以再拉筋...

今次好多跑手一早已經到場準備, 好認真...
睇佢哋嘅身形同裝束, 大部份都應該係高手...

起跑點同集合點有一段距離, 所以食完Energy Gel後, 慢Jog到起跑點...

去到起跑點, 未算人多...
由於起跑路段頗窄, 我哋唔敢企得太前, 以免阻礙其他高手, 所以留喺起跑點前嘅隧道內...

起跑後, 路段被花槽分成左右兩半, 我去咗左邊, 阿輝去咗右邊...
賽道頗窄, 要盡快超越自己前面跑得較慢嘅跑手...
跑咗500米先至追到阿輝, 賽道亦合二為一...

初段2Km, 勉强可以跟到阿輝, Pace 4:15-4:20左右, 但係已經開始覺得無力...
上橋前已經被阿輝拋離, Pace跌到4:30-4:35...

之後唯有繼續死捱, 維持Pace 4:35...
當時已知PB無望, 所以唔諗咁多, 盡能力跑...

過咗回頭點後, 體力已經開始下降, Pace曾經跌到超過4:40...

去到最尾500m, 超越「大露背」, 可能佢嘅狀態都係麻麻哋...
到最後200m, 發力過埋「黑炭頭」...

成績相當麻麻, 只係比香港10公里挑戰賽快咗少少...

手錶計時45'15", 大會時間45'29", 晶片時間45'15"...
排名(組別) 62/208, 排名(男子) 161/714, 排名(全場) 176/871...

賽事完成後返回集合點, 已經有好多人拉o緊筋...
聽到身邊一個平常阿叔模樣嘅Uncle話跑到44", 今次賽事真係多高手...

阿輝跑完10Km, 之後立即去行山, 真犀利...
我每次比賽完, 左腳阿基理斯腱都會痛, 所以賽後活動, 唔駛預我...

當日等起跑時發現一個問題, 隧道內係收唔GPS訊號, 所以要出隧道後, 自動偵測及鎖定衛星訊號...
返到屋企睇Log, 個GPS喺起步後5分鐘先至成功鎖定衛星訊號, 不過, 移動途中係較難鎖定, 呢點絕對明白...

上兩次都唔記得寫低完成渣打半馬嘅時間...

手錶計時1hr45'59", 大會時間1hr46'11", 晶片時間1hr45'56"...
排名(組別) 97, 排名(男子) 313, 排名(全場) 345...

比美津濃香港半馬拉松錦標賽2010慢咗2'16", 亦係預料之內...

上星期三係半馬賽事後首次慢跑, 荔枝角公園慢Jog咗6.65Km, 其實腿部肌肉未復原, 想跑快啲都唔得...

星期六正式復操, 著ASICS GELFEATHER GS 2跑10Km, 以48'04"完成, 覺得自己不在狀態...

星期一係普施健「沙田10K」河畔賽 2010賽前同阿輝最後一次練習10Km, 為咗保慢護雙腳, 都係著GELFEATHER, 46'13", 不過不失...

近排練習不足, 信心大減, 依家已經失去咗要做好時間嘅o個團火, 預料比賽時間會比香港糖尿聯會健康長跑2010差, 達到Sub 46已經心滿意足, 一於Enjoy The Race!!!

雖然渣打馬拉松當日温度稍高及濕度頗高, 但我又唔覺得太辛苦, 只係頭2Km出得比較多汗, 其餘時間都無大問題...
相比起夏天, 三十幾度烈日當空下, 當日嘅廿四度真係算小兒科...

沿途每5Km起碼有一個水站, 我主要揀Watson's Isotonic , 貪佢係一包包, 有膠吸嘴, 易飲啲...
除咗水及Watson's Isotonic外, 水站仲有濕水海綿...
濕水海綿喺濕熱天氣好有用, 印吓塊面、後頸及手臂, 舒服好多, 精神為之一震...

今次參加渣打半馬, 有幾個幾特別嘅經驗...
- 廿幾三十年內都未試過咁早瞓...
- 天都未光就起跑...
- 第一次靠雙腳跑過海...

渣打馬拉松雖然係全年裏面其中一個重點項目, 但我又唔覺得太興奮, 可能過於擔心腳傷...
始終覺得呢個係一個賽事, 唔係一個Party, 要認真對待, 所以當日傷後鍛練不足而參加比賽, 真係有啲唔開心, 覺得自己好似無盡力...

由於賽前長課不足, 耐力程度稍弱, 捱完西隧出口長命斜加上干諾道西天橋, 小腿前下方扯住扯住, 被逼減慢跑速, 甚至雖要停低步行十秒, 舒緩痛楚...
跑半馬都雖要停低步行, 心裏面覺得好遺憾...

別外有一個經驗, 喺10Km食GU Energy Gel係不智, 因為食完Gel後會口乾, 要捱到15Km先至有水站...
以後都係喺9Km及14Km食, 起碼預計到大約10Km及15Km會有水站...

由尖沙咀彌敦道出發開始, 久唔久都會有各間大學嘅打氣團隊, 大部份路段屬於高速公路, 無其他觀眾實屬正常...
過咗馬師道天橋轉入駱克道, 時間只係7:30am左右, 人流唔多...
去到Sogo, 圍觀人仕嘅數量漸多, 不過氣氛都係比想像中冷清, 無o個種另人熱血沸騰嘅感覺, 頗為失望...
希望下年可以7:00am起步, 到時人流較多, 氣氛更好...
再唔係就搏命, 索性參加全馬, 到達銅鑼灣時, 一定好氣氛...

星期六晚9pm就瞓, 但係瞓到11pm又醒咗, 瞓唔番, 索性起身睇一陣小說...
到12am再瞓, 典咗好耐先至瞓著...
到3am就起身, 加加埋埋, 都唔知有無瞓咗五粒鐘...

搭頭班3:55am特別班地鐵去尖沙咀, 成車都係參加渣打馬拉松跑手, 不過大部份都應該係參加十公里賽事...

4:30am到達中間道海員俱樂部, 成條街靜英英...
阿輝未到, 唯有影吓相先...

換衫後, 同阿輝一齊影咗幾幅相, 食多個麵包, 之後拉筋熱身...

Jog去起步點, 沿途未見好多人, 可能起步時間早咗, 參賽者無咁早到...
回頭到中間道, 已經成身汗, 濕度高, 汗揮發唔到...

食完GU Energy Gel, 5:35am抵達起步點, 未算人多, 可以企得離起點線頗近...

不知不覺等到6:00am起步, 天都未光...

開頭唔算擠擁, 彌敦道左轉柯士甸道, 再右轉入廣東道, 人流開始較疏, 可以用正常跑速...
頭5Km跟住阿輝, Pace 4'50"左右, 之後開始跟唔到...

跑到近長沙灣時, 天色開始光...

過咗轉折點(約7.5Km)後, 橫隔膜開始投訴, 唯有減慢跑速少少到Pace 5'00"及繼續死捱...

印像中10Km前好似有三個水站, 攞咗一次水, 濕濕口...

過咗10Km, 食包Energy Gel補充體力, 但跑咗2km後都未見水站, 乾食Energy Gel都幾難頂...
終於去到入西隧前見到有水站, 攞咗包Watson's Isotonic, 飲咗大半包, 估唔到咁口喝...

跑到西隧中段, 開始覺得焗, 即刻出汗...
終於到達西隧後段, 呢個係長命斜路段, 遠遠望見阿輝跑最左邊線位, 賽前阿輝已提示雖然左線路程較長, 但較平坦, 所以較省力...
幾經艱辛, 捱完出西隧, 但係仲有一隻左上斜大彎要努力, 跑到過咗最高點後, 真係鬆一口氣...

跑過一小段平路後, 開始上干諾道西天橋, 跑到橋頂後, 兩隻小腿下方前肌覺得扯住扯住, 一路跑一路痛...

到達17Km前, 食多包Energy Gel頂一頂...

捱到過咗超斜嘅畢打街隧道後, 終於頂唔順, 要停跑步行十秒左右, 放鬆小腿前肌, 再繼續跑...

上咗夏慤道天橋後, 又要步行幾秒放鬆肌肉...

去到會議道, 小腿前肌痛, 頂唔住, 再度停低步行十秒抖抖...

今次真係畀啲上斜天橋玩殘, 上咗馬師道天橋, 停跑步行幾秒, 再衝落橋...

進入駱克道, 時間尚早, 兩旁嘅路人唔多, 無乜人打氣, 氣氛比想像中冷清...

開始搜尋我嘅御用攝影師, 跑到去記利佐治街, 原來企咗喺宜家傢俬門口位, 即刻扮哂精神, 好似仲有大把喺手咁樣...

跟住轉入告士打道, 再左轉入維多利亞公園衝線...
好彩半馬/全馬同十公里係分開兩條跑道, 十公里o個邊塞哂車, 如果係同一條跑道, 都唔知點樣發力衝線好...

完成賽事後, 同阿輝喺銅鑼灣運動場休息及影相, 當然唔少得食番隻蕉補充體力...

食完個豐富早餐後, 去咗告士打道皇室大廈外, 幫阿Ban嘅全馬賽事加油打氣...

上星期六一早去咗維多利亞公園攞渣打半馬號碼布及紀念包, 由於時間尚早, 所以唔駛排隊...

之後到所謂嘅嘉年華會逛逛, 影吓相...

個嘉年華會無乜嘢睇, 得贊助商及理工大學擺攤位...

百無了賴, 去咗New Balance個攤位玩測跑姿, 好明顯係腳踭觸地...
原來我隻右腳係有少少外八字, 左腳就正常, 但係反而左腳嘅阿基里斯腱出事?!
其實要自己測跑姿都好容易, 搵部DC或DV, 喺跑步機錄影就可以...

當日仲試咗New Balance RT769及RC769...
覺得RT769頗硬, RC769就較貼腳...

昨晚原本打算Light Jog, 不過喺公司遊走咗整日, 加上放工後去街, 返到屋企已經頗攰, 所以放棄Light Jog呢個打算...

今晚及明日要全力休息, 明晚要早啲食晚飯, 九點就要瞓...
六點鐘開跑, 即係四點半前要到尖沙咀, 又要搭頭班特別加班地鐵...

上星期五練跑, 阿基里斯腱再次隱隱痛, 只能慢跑10.5Km...

抖咗兩日, 星期一好似無乜事, 放工後到荔枝角公園跑咗15.3Km, 阿基里斯腱無嚴重投訴...

不過近排大腿肌肉耐力訓練唔夠, 跑完15.3Km LSD後, 攰咗幾日都仲未復完, 打算今晚Light Jog一陣, 鬆鬆筋骨及幫助清減乳酸...

以最近狀態預計, 設定渣打半馬嘅Racing Pace為5'10"...
如果傷患無加劇, 兩個鐘頭內應該可以完成半馬賽事...

香港糖尿聯會健康長跑2010後三日, 跑荔枝角公園練LSD, 準備渣打2010半程馬拉松...

仲記得當晚體力充沛, 唔似比賽後三日嘅狀態, 結果跑咗17.2Km...
不過夜晚瞓到半夜, 開始覺得左腳阿基里斯腱痛, 第二日返工時都仲係覺得隱隱痛...
開頭不以為意, 第二晚用冰敷, 作用不大...

隔兩日落場跑, 頭兩三圈腳痛依然, 全面熱身後痛感消退, 但跑到7Km左右, 又再痛過, 捱到8Km就放棄, 唔想加重傷患...

抖咗一日, 再次落場, 同上次一樣, 捱完8Km就收工...

諗諗吓, 咁樣都唔係辨法, 離渣打半馬已經時日無多, 所以決定去睇醫生...
醫生幫我打咗枝針, 再加消炎藥, 建議我出街戴Ankle Support...

第二日去買咗LP Extreme Ankle Support, 保護性好高, 好彩對鞋有少少鬆, 如果唔係都唔知點樣可以著住出街...
戴咗兩日Ankle Support, 加埋醫生啲藥, 阿基里斯腱已經無隱隱痛...

由於LP Extreme Ankle Support比較重型, 覺得唔係咁方便, 所以過農曆新年前又買多過輕量化嘅Futuro Comfort Lift Ankle Support, 諗住將來可以經常戴...

休息咗一個星期, 雖然心知渣打半馬應該做唔到好成績, 但再唔復操就會唔夠時間進入狀態, 年初二用超慢跑速去荔枝角公園試試...
心驚膽跳咁完成10Km, 返到屋企即刻戴LP Extreme Ankle Support, 對阿基里斯腱施加壓力, 好彩當晚及第二日都無痛...

隔咗一日, 年初四再跑, 今次可以放膽啲, 跑多2Km及Pace快10秒, 基本上都算係輕鬆完成...

離渣打半馬仲有個多星期, 練習多兩次就要收工休息, 希望今晚或星期日可以跑一次15Km以上, 提升狀態...
如果無乜大問題, 最好下星期五可以跑多轉短距離Light Jog, 保持運動量...

依家最緊要係o係練習期間, 唔好再整傷腳...

香港糖尿聯會健康長跑2010前, 專登著ASICS SKYSENSOR BREEZE 2加Mizuno襪落場練Tempo, 點知跑到6Km左右已經覺得唔妥, 左右兩隻腳板底開始覺得痛, 足弓位前部份出水泡, 不過唔埋咁多, 繼續死捱...
返到屋企除咗鞋望一望, 原來個水泡都幾嚴重, 第二朝行路都仲係痛...

其實買鞋o個時已經知道對SKYSENSOR BREEZE 2係好Tight Fit我對闊腳板, 但SKYSENSOR BREEZE 2 WIDE又唔係自己鍾意嘅黑黃鍾無豔顏色, 所以唯有搏一搏買正常版, 依家知道Mizuno呢款襪加SKYSENSOR BREEZE 2係唔啱我對腳......

最抵死係Mizuno襪加ASICS GELFEATHER GS 2正常版, 跑半馬完全無問題, 一啲都唔痛, 所以鞋加襪嘅配搭都好重要...

如果係買Mizuno鞋, 一定揀Wide版, 正常版著唔落, 唔駛諗...

之前幾次10Km比賽用New Balance襪搭SKYSENSOR BREEZE 2, 雖然都係有少少痛, 但無乜大問題...
一直都想買返呢款New Balance襪, 但搵咗好地方都搵唔到, 淨得女裝, 無男裝...

既然對SKYSENSOR BREEZE 2咁難搞, 索性買過另一對比賽鞋, 遲啲再慢慢搵襪配搭SKYSENSOR BREEZE 2...

Mizuno Wave Idaten系列啱啱出咗新款, 雖然係比賽鞋, 但前掌部份幾厚, 鞋身比Mizuno Wave Aero 8 Wide輕, 又唔貴...

試過Mizuno Wave Idaten 5 Wide之後, 雖然覺得保護性無Aero 8咁强, 不過Idaten係比賽鞋, 以輕量為大前提, 目標唔同...

當日仲試咗ASICS TARTHERBLITZ及Mizuno Wave Spacer AR Wide...
覺得ASICS TARTHERBLITZ唔係咁啱我...
Spacer AR Wide就好似無以前RS4咁舒服, 而且個踭位好窄, 企都企唔穩, 非常戰鬥格...

比賽前五日同阿輝落場Run-in對Idaten 5 Wide, 著Mizuno襪, 今次覺得有少少鬆, 腳板咬唔實對鞋, Mizuno襪真係太薄, 只可以夾到GELFEATHER GS 2...
鞋前掌幾厚, 另到整個人嘅重心高咗少少, 唔知係好事定壞事...
新鞋真係舒服啲, 緩震力好好多, 又咬地, 當晚跑10Km, 45'40"59, 都未試過喺場可以跑到Sub 46, 阿輝做Pacer帶住我跑, 鬥志會比平時好好多...

香港糖尿聯會健康長跑2010用Idaten 5 Wide上陣, 終於可以跑到Sub 45, 對鞋都有份幫手, 功不可沒...

終於到咗香港糖尿聯會健康長跑2010, 為咗呢個比賽, 苦練咗一個多月...

搭頭班72到沙田火車站, 等埋阿輝一齊搭的士到白石角海濱長廊, 去到都只係7am左右, 無乜人, 可以慢慢換衫同熱身...

當日同阿輝一齊著住糖尿聯會嘅背心, 因為覺得幾有義意...
另外, 著咗新戰鞋Mizuno Wave Idaten 5 Wide, 感覺唔錯...

8am未夠, 已經準備好哂, 可以上線...

今次企得幾前, 不過起步點係樽頸位, 企中間會著數啲...

8:13am提早起步, 一開始見到身邊跑手衝得好快, 令到自己不自覺地加速, 但都仲係不停被其他跑手超越, 心諗係咪自己狀態唔好...

到1Km路牌, 原來只係用咗4分鐘多少少, 比以前嘅比賽快咗...
上線企得太前真係唔係咁好, 自己未夠班, 又要死跟, 頭1Km好易消耗過多體力...

2Km之後, 已經跟唔到阿輝, 唯有孤軍作戰...

喺1Km路牌時, 按錯咗手錶, 搞到計時停咗, 之後跑咗約300m先至發現, 失去時間紀錄...
後來發現原來只得1Km, 2Km及5Km係有路牌, 中間嘅分段時間無從估計...

頭5Km要保留體力, 但無咗時間資料, 要控制自己跑速唔係咁易, 唯有因應身體狀態調節...

好彩手上仲有Nike+ Sportband, 仲可以知道大約全程時間...
去到5km路牌, U Turn回程, 時間約22'...
心裏面計一計, 如果可以保持Pace 4'35", Sub 45應該無問題...

回程路段, 太陽開始猛...
大部份時間, 同前後跑手都係相距50m以上, 比較疏落, 得自己一個孤零零咁跑...
無得跟住其他跑手, 又無路牌可以用嚟計時, 最擔心係自己會越跑越慢...

去到回程水站, 為咗節省時間, 放棄飲水...

到最後2Km, 約略估計到可以Sub 45, 不過繼續保持跑速, 死捱最後一段路程...

Nike+ Sportband計時44'32", 大會時間44'34", 晶片時間44'31"...
排名(組別) 46/224, 排名(男子) 83/543, 排名(全場) 91/678...

終於可以以Sub 45完成, 達到自己嘅目標, 比第三屆美津濃石門10公里賽快咗三十幾秒, 之前嘅努力無白費...

Ban隻Nike+ Sportband同我o個隻都係差唔多時間買, 估計都係同一水貨...

三星期前, Ban話佢o個粒Sensor已經無電, 我當時仲話佢跑得多, 所以耗電較快...

估唔到美津濃香港半馬拉松錦標賽2010後復操時, 發覺我o個粒Sensor都係同一命運, 呢水貨嘅電池咁快就無電...

反正粒Sensor已經死咗, 一於拆開佢, 試吓自己換電池...

用咗10分鐘界開個殼, 原來粒電池只係CR2032, 屋企有存貨, 立即著手更換...

求其用膠紙黐實電池接觸點, 試試粒Sensor先, Sportband有反應, 初步證實粒Sensor無事...
將啲電線走靚啲, 蓋上個殼, 等待跑步測試...

後來到荔枝角公園跑, 可惜得到嘅讀數比實際少一倍, 之後仲Hang埋...
估計拆開Sensor時, 唔小心整壞咗個Piezoelectric Accelerometer, 搞到粒Sensor傻傻哋...

好彩之前已經喺Apple Store買定多一粒, 如果o個粒都無電之後, 先至決定係咪繼續用Nike+...