研究咗幾日PLAYSTATION 3, 部機可以用嚟打機及睇BD, 但都未夠推動力令我去買...
後來爬文發現部機可以做DVD Upscaling去1080p, 呢個Function對我嚟講極之有用...
最後終於忍唔住手, 星期五去銅鑼灣Sony Style睇睇, 可惜啲Game無邊隻啱玩, 再去皇室堡玩具反斗城, 更加失望, 結果空手而回...

諗住星期六朝早去旺角Sony Style, 點知黑雨, 唯有等到下晝先至去...

可惜旺角Sony Style同銅鑼灣差唔多, 最後選擇口碑好好嘅Grand Theft Auto 4...
原本諗住買埋個Blu-ray搖控器, 不過Sony職員話可以用手掣代替, 咁就慳番二佰幾...

番到屋企, 首先試睇DVD, Upscale嘅效果好明顯, 比起部用咗六年以上嘅Sony DVD Player, 畫面細緻好多, 顏色亦較為豐富...
部Sony DVD Player已經係用色差輸出, 可能太舊, 只係出到480p, 所以效果差好遠...

部PS3都幾熱, 尤其係個機底, 機背亦有熱風出, 又係一部食電電器...
另外, 個手掣雖然係無線, 可惜無Dual Shock...

至於隻GTA4, 唔係好識玩, 週圍去聊事鬥非, 要花少少時間睇睇Manual...

其實想買Blazing Angels 2, 駕駛World War II戰機執行任務, 可能呢隻Game較冷門及較舊, 兩間Sony Style都無...

星期日天色麻麻哋, 去鴨記買多條HDMI線, 花多眼亂, 價格由幾十到千幾都有, 最後買咗條$160嘅德國貨, 其實好懷疑係咪真係德國貨...

跟住去黄金逛逛, 估唔到真係畀我搵到隻Blazing Angels 2, 得一間有得賣, 好好彩...

呢個Game好過癮, 第一關揸架Spitfire Mk. I做訓練任務...
操控可以利用SIXAXIS去控制Elevator及Rudder, Aileron及Throttle就用番Right Stick, 非常過癮...
不過我都係鐘意用番類似Mode 1做操控, Right Stick係Aileron及Throttle, Left Stick係Elevator及Turn...
個Turn特別少少, Rudder及Aileron會一齊郁, 好似用咗Program Mix咁...

攻擊地面時用Stall Turn, 被敵機追擊可以用Snap Roll避子彈, 打Loop及反飛就更加係常用技術, 玩到唔停得手...
5.1聲道輸出, 音響效果幾震撼...
最可惜畫面只係得720p, 不過基本上都足夠...
另外, 再買多個Dual Shock手掣, 玩起上嚟更加有手感...

星期一係假期, 好猛太陽, 不過都無打算去玩飛機...
今年好怕熱, 見到出面咁晒, 寧願留喺屋企, 唔想咁辛苦...

之前未轉高清時, 見到高清翡翠台「天與地」廣告, 已經好想睇...
前兩日走去買埋套「天與地」BD, 番到屋企即刻試睇...
插入PS3, 電視跟住顯示1080/24p, 正!!!
終於可以發揮個電視嘅真正實力...
番工咁疲累, 收工後睇吓大自然景色, 一大享受...

同之前喺高清台錄低嘅「天與地」作比較, 1080/24p明顯喺某啲移動畫面無震, 色彩較好, 電影感亦强少少...
高清台雖然係1080i, 但質素其實已經好好, 如果唔係有心比較, 基本上係可以接受...

我對音響組合其實唔係咁熱衷, 都唔趕住Upgrade上HDMI Amplifier聽DTS-HD, 如果個Sony 5.1 Amplifier唔壞, 睇嚟套System可以幾年唔駛再Upgrade...