依家跑步主要為減磅...

為求燃燒脂肪, 以自己嘅年紀, 心跳率要保持每分鐘111至148之間, 連續跑45分鐘以上先至有效...
如果心跳過快, 身體會進入無氧運動狀況, 令肌肉產生乳酸及令肌肉疲憊, 身體要休息幾日等乳酸代謝掉, 所以過量的運動會影響效率...

上星期喺Gym開始改變跑步習慣, 用較慢步速跑45分鐘, 減低心跳率, 距離多少無所謂...
星期六落場跑用同一策略, 發覺雖然係步速慢, 但由於時間長, 其實比以前跑得仲遠咗...

為求量度心跳率, 買咗隻Ciclo Sport CP 12C測心跳跑步手錶連心跳帶...
心跳帶唔需要紥得太緊, 基本上唔影響呼吸...
喺屋企試用, 靜止時心跳率55左右, 用把脈方法量度比較, 相差無幾...

星期六落場試用, 左手手錶計算圈速, 右手手錶量度心跳率...
保持慢跑速度(2'30" 400m), 心跳率平均172左右...
有師兄提過, 啱啱開始練跑, 17X算係正常, 可以接受, 練習多咗, 强化心臟功能後, 心跳率自然會下落...

據聞條心跳帶可以配合跑步機, 未有機會試...
不過喺Gym跑步用心跳帶, 好似好異相...