美津濃香港半馬拉松錦標賽2010當日, 搭的士去旺角火車站, 約咗Ban喺大埔墟火車站轉75K巴士入大美督...

去到大美督約6:50am, 已經人山人海...
向水壩方向行, 途中攞號碼布及晶片...
行李區喺直昇機坪, 見到阿輝已經到咗...

急急腳去流動洗手間排隊, 阿輝就幫我安置晶片...
但條龍好長, 等咗兩個字都仲有三個先至輪到我, 索性放棄, 又走返去直昇機坪, 換咗衫及鞋先至算...

匆匆寄存行李, 揸埋花士令及食GU Energy Gel, 行去起步點, 忽然醒起唔記得換太陽眼鏡, 又要走返上去直昇機坪, 可惜寄存區太多人, 唔好意思麻煩工作人員幫手搵我件行李...

之後再搵洗手間, 終於喺燒烤場旁嘅洗手間成功解決, 等咗唔洗五分鐘, 下次唔好咁笨排流動洗手間, 浪費咗15分鐘, 想食多個麵包都趕唔切...

一波幾折, 行嚟行去用哂啲時間, 無機會拉筋, 唯有同Ban及阿輝Jog去起步點當熱身...
到達起步點約7:45am, 未算太多人, 立即係咁兒拉小腿及四頭肌, 非常無奈...

準時8:00am起步, 由於起步後開始上山, 所以初段比較擠逼, 速度較慢...

呢個賽道除咗水壩係平直路外, 我估計其餘路段80%都係上山/落斜, 仲要係長命斜...

喺新娘潭路段, 好辛苦跑到上山頂, 轉個頭跑完烏蛟騰路段, 又要跑新娘潭路落斜路段...

原來落斜仲辛苦, 身邊啲跑手個個都係衝住落山, 自己唯有加快腳步, 每一步大腿及小腿都要承受頗大重量...

掛住落斜, 過咗10Km路標先至醒起要食GU Energy Gel...

衝完落斜, 大腿肌肉有少少痛, 跟住又開始微斜上山, 腿部肌肉可以稍稍休息, 之後又落山進入大美督路段...

去到水壩平直路, 跑得舒服好多, 起碼肌肉可以稍為放鬆, 但已經無力加速, 保持Pace 5'00"...

過咗水壩, 賽前已經有心埋準備, 知道又要喺白沙頭上山落斜...
唔知係咪體力已經消耗得差唔多, 覺得呢段路持別斜...
最慘喺上山落斜後, 再跑多一小段平路, 跟住掉頭, 又要再上山落斜, 大部份跑手喺上山路段已經減慢速度...

喺白沙頭回頭路段, Ban已經追到我, 佢後段跑得好順好快...
Ban問我可唔可以保持Pace 5'00", 我話應該無問題, 咁佢就話我哋可以1hr45'內完成, 攞到銅章及八折優待券...
其實比賽途中, 我都無刻意計算預期完成時間, 只知道Pace約5'00"...

為咗八折優待券, 唯有繼續死捱...
去到水壩回頭路段, 過埋最後1Km路標, 望一望手錶, 知道張八折優待券已經袋咗半張落袋, 最後用僅餘力量, 稍稍加速, 同Ban一齊衝線...

手錶計時1hr43'43", 大會時間1hr44'17", 晶片時間1hr43'40"...
排名(組別) 186/540, 排名(男子) 511/1604, 排名(全場) 546/1873...

第一次參加半馬賽事, 亳無經驗, 好彩比賽初段留力, 如果唔係尾段都幾難捱...
賽道沿途風景唔錯, 最開心係跑水壩, 可以望住船灣淡水湖跑...

Ban跑開全馬, 半馬對佢嚟講真係無難度...
當我喺水壩喘氣衝向終點, 佢仲可以氣定神閒咁幫我打氣加油...

今次最失敗係唔記得換太陽眼鏡, 搞到大汗o個陣時要除咗眼鏡跑...
仲有唔記得調校DV, 最後乜都錄唔到...

當日首試阿輝隻GPS手錶, 紀錄嘅路程幾準確...
最鍾意嘅設計係隻錶有三個Views, 每一個View可以顯示唔同嘅資料...

休息咗幾日, 昨晚先至回復訓練...
起初諗住慢跑10Km, 三個熱身圈後, 覺得狀態可以, 決定練Interval, 勉强可以保持Pace 4'20"...

仲有兩星期就係"香港糖尿聯會健康長跑2010", 今次一定要Sub45...

今個星期日就係美津濃香港半馬拉松錦標賽2010, 亦係自己第一個半馬賽事...

當初決定参加呢個賽事, 係因為想喺渣打半馬前, 試吓自己嘅實力及攞少少半馬参賽經驗...

為咗呢個比賽, 一個月前開始練LSD, 每星期增加2Km...

元旦日去咗海洋公園行咗成日, 第二朝體力未回復, 比賽前最後一個LSD只能夠完成15Km, 未能達到21Km嘅目標...

據聞大美篤呢條路線, 除咗水壩一段係平直路外, 其餘都係上山落斜, 諗落都覺得有難度...

希望星期日可以兩個鐘內完成, 以享受比賽過程為主...

自從2009年2月飛完GeeBee EPP BX後, 就停止飛行運動, 專注跑步減肥...

上星期日終於喺2010年第一個星期日重出機壇, 首先用Ultima EPP SOV作為熱身...
星期六晚仲落雨, 星期日起身時路面已經開始乾, 天文台預測多雲, 反正义哂電, 決定到啟德搏一搏...

Ultima EPP SOV裝備:
- Dualsky XM2834CA-9
- APC 11x3.8SF
- Otter BS40A
- Futaba R617FS
- Futaba S3110 Servo x 2
- Futaba S3156 Servo x 2
- Zeta-Plus 11.1V 1000mAh 20-25C, Zeta-Plus 11.1V 1300mAh 15-20C

據房仔講, 巴士站位入口已經封咗, 唯有從停車場進入...
7:15am到達, 去到當年初到啟德時嘅地點附近, 平地不算大, 足夠畀SOV起飛及降落, 不過有棵小樹稍稍阻擋視線...

二話不說, 立即飛番轉先...

第一個Flight, 竟然覺得架機飛得快, 以後仲洗玩Balsa機?!!
飛咗幾圈後, 啲感覺開始返嚟...
CG稍前, 用手指作微調, 再Tune咗兩下Aileron, 搞掂!

Hovering及Torque Roll嘅技術仲可以, 不過信心不足, 唔敢太過低位...

當日玩咗9個Flights, 主要都係練一啲基本動作, 等自己稍作適應...
好彩當日無風, 仲係藍天白雲, 可惜地面較濕...

玩到8:15am左右, 有一位駕棉羊仔電直機友到場...
呢位仁兄喺二十米外起機, 玩哂花式, 唔理他人安危, 機品非常之差, 香港人自私又一例証...
真係好想犧牲架Ultima EPP SOV撞佢落嚟, 減少一個敗類...

下次要再搵地方, 最好可以去返以前塊空地, 咁就最好...

為求達到10Km可以做到Sub 45, 每星期都會計劃一日做Interval Training...

依家練Interval最快只可以做到1'42"一圈400m, 平均要1'44", 希望喺"香港糖尿聯會健康長跑"10Km賽事可以達到Sub 45...

唔知係咪大腿粗咗或練快跑時習慣提大腿, 著開o個條Nike DRI-FIT Shorts竟然磨損大脾內側...

其中一個解决方法係揸花士令, 但我又唔鍾意花士令o個種感覺...

將條短褲側邊剪開1.5吋, 令條褲有少少Split嘅效果...

聖誕日起身食咗燕麥拉麵, 過兩粒鐘先去公園跑LSD...
當日預期跑19.2Km, 但跑到一半, 已經開始覺得腳軟...
10Km時食咗一包GU Energy Gel, 但幫助不大...
到最後2Km, 要死捱先至能夠完成...
時間比上一星期慢好多, 應該係早餐唔夠飽所至...

條改Split短褲可以接受, 跑完19.2Km, 大脾內側只係有少少痛...

為咗唔想影響比賽成績, Boxing Day去買咗條Nike DRI-FIT Split Shorts...
原來褲管布料接駁位製法完全唔同, 條Split Shorts車多咗一條布邊喺接駁位, 令到褲管邊更加平滑, 減低磨擦...

星期日落場練Interval, 今次比上星期較輕易就可以保持到1'42"一圈, 有少少進步...
條Split Shorts唔錯, 無再磨大脾內側...

昨晚第一次做Tempo Training, 目標定為Pace 4'40"跑6Km, 開頭有啲擔心可唔可以做到, 但10Km比賽時能夠以平均Pace 4'30"完成, 無理由Tempo做唔到...
結果又覺得唔困難, 有兩三圈仲跑得快過Pace 4'30", 下次再加多一圈...

近排天氣凍, 夜晚得12度, 我就唔夠膽著短褲加短Tee練跑, 最主要係唔想病, 病咗就會打亂自己嘅訓練計劃...

加上天氣乾燥, 喺户外吹成粒鐘, 須然係跑o緊, 雙手依然覺得凍...

專登去Sogo買咗對Mizuno手套, 質地唔太厚, 足夠保温之餘又可以防「爆拆」...
原本諗住買黑搭黄, 可惜得番中碼, 被迫買黑搭粉紅, Sharp得嚟又幾型, 可以接受...

至於下身, 咁凍一定著Long Tight, 唔駛諗...

上身就麻煩少少, 秋天時試過著一件Long Tee跑, 件Long Tee頗為單薄, 所以覺得幾凍...

後來考慮買Mizuno BioGear, 喺Sogo試日本碼XL, 非常貼身, 著落身都有啲困難, 但係著咗包實上身又幾好Feel...
件BioGear嘅質地好薄, 好似身體第二層皮膚一樣...
可惜無減價, 二佰七十大元, 買唔落手...

跟住去咗Nike Shop, 啱啱減o緊價, 有件Nike Pro Compression Short Sleeve Crew減到$165...
搵咗L碼及XL碼入更衣室試, 原來L碼已經係腰位太濶身, 如果唔係之前試過件BioGear, 可能會揀L碼...
再搵件M碼試試, 呢件腰位貼哂, 上胸直頭有迫爆嘅感覺, 同BioGear差唔多, 決定買呢件...
Nike Pro嘅質地比BioGear厚少少, 不過耐唔耐用就暫時未知...
另外當晚試咗件Nike Long Running Tee, 可惜無新貨, 如果唔係買兩件仲可以有額外九折...

星期六朝早天寒地凍, 著Nike Pro打底, 加Long Tee及Long Tight, 起初覺得有啲凍, 跑熱咗之後就好好多...
件Nike Pro幾緊身, 吸汗之餘又唔焗, 用嚟打底保暖真係幾好...
開頭唔係好慣, 呼吸唔暢順, 習慣咗之後就無大問題, 完成17.3Km嘅計畫...

昨晚又去練6組Interval, 今次目標Pace係4'20", 一圈要比上星期快4秒, 果然辛苦好多, 都唔係每組可以達到目標, 下星期都係用番呢個Pace, 等身體適應咗再加快到4'15"...

星期六如計劃一樣, 跑咗15.3Km, 時間1hr17'28"13, 跑得稍為快咗, Pace慢少少應該較為適合, 唔會太過疲累...
今個星期六會加多一圈, 超越17Km, 不過要小心控制跑速, 唔可以跑得太快...

東亞運半程馬拉松賽事當日, 天色灰暗, 同阿輝去咗將軍澳支持香港運動員...
8:15am去到將軍澳運動場出口, 等8:30am開始嘅男子賽事...

準時聽到鳴槍, 隔咗一陣男子運動員跑出運動場, 首先見到一堆運動員領先喺前面, 跟住後面有幾位, 香港嘅陳家豪及賴學恩明顯被稍稍拋離...
第一圈回程時, 香港兩位運動員已經被拋離200m以上...

到8:45am, 女子賽事開始, 李雪菲及范瑞萍處於稍後位置...

賽事稍後時間, 天色漸好, 出埋太陽, 對運動員頗為辛苦...

最後陳家豪及李雪菲以1hr15'35"及1hr24'28"完成, 呢個成績雖然同其他選手有一段距離, 但已經相當犀利...

星期二原本打算練Interval, 但係運動場關閉, 被迫跑公園...
開跑後十分鐘, 開始落毛毛雨, 跟住越落越大...
既然已經濕咗大半, 索性堅持跑完剩下嘅路程...
啲雨水滴落頭殼, 覺得幾凍, 唯有跑快啲保持身體温暖...

昨晚天氣好凍, 著Long Tee, Long Tight及手套, 只係啱啱夠暖...
落場前背熟咗練Interval嘅計劃, 2圈Pace 4'30", 1.5圈Pace 6'00", 做六組...

由於係第一次練Interval, 所以Pace無Set得太高...
原本計劃做五組, 後來覺得仲有氣力, 所以臨場加多一組...

整體上暫時覺得練Interval唔太困難, 中間1.5圈Resting Lap有足夠時間回氣...
其實Resting Lap好難做到Pace 6'00", 因為唔慣慢跑, 通常都會跑得太快...

下星期會加快Pace到4'15", 應該會幾辛苦...

經過兩次比賽後, 上星期二跑荔枝角公園, 時間比以前快咗好多...

休息四日, 星期日一早搭頭班地鐵去石門参加第三屆美津濃石門10公里賽...

7am未夠就已經抵達, 同阿輝行去起步點望一望, 跟住返集合點攞號碼布及Sensor...

換完衫及鞋, 跟住拉筋...
集合點無洗手間, 要去到小瀝源遊樂場先至有, 索性Jog去當熱身...

當日天氣幾好, 涼涼哋, 又唔係好曬...
等到8:00am, 食GU Energy Gel, 準備上線...
估計高手雲集, 所以唔敢企得太前...

由於預計賽道較窄, 比賽一開始立即快放, 盡快遠離人群, 避免被阻塞...
策略成功, 起步500m後已經開始疏落, 但係衝得咁快嘅壞處就係氣喘, 頭1Km做到4'08"60...

跟住開始放慢, 2Km及3Km保持4'25"82及4'27"73...

過咗3Km, 開始跟唔到阿輝, 唯有自己繼續死捱...

條路好好跑, 印象中只係有兩小段斜路, 唔會太辛苦...

過咗5Km轉拆位, 稍減慢跑速到水站, 飲一小啖水...

體力開始下降, 跑速減慢到4'37"左右...

一直捱到過咗橋, 剩低1Km, 用僅餘嘅力量加速...
去到最後200m, 咬實牙關, 全力衝刺, 衝到最後10m, 差啲碌低...

手錶時間45'07"67, 大會時間45'22", 晶片時間45'06"...
排名(組別) 61/297, 排名(男子) 155/1010, 排名(全場) 163/1212...

雖然破咗自己嘅10Km紀錄, 比聯合國兒童基金會慈善跑2009快咗5秒咁大把, 但係喺咁好嘅天氣加上平路, 未能做到Sub45, 覺得好可惜, 心有不甘...
比賽後段時, 其實唔係太辛苦, 唔明白點解最後幾Km可以慢到4'37"/Km...
如果要比較, 我覺得聯合國兒童基金會慈善跑最辛苦...

昨日報咗香港糖尿聯會健康長跑2010, 可以填補美津濃香港半馬拉松錦標賽2010及2010渣打馬拉松中間嘅空檔...
呢個比賽由白石角海濱長廊起步, 經大埔吐露港緩步徑至元洲仔公園再拆返, 長度10Km, 估計大部份係平路, 呢次要作好賽前訓練, 再次挑戰Sub45...

依家要開始準備美津濃香港半馬拉松錦標賽, 得番一個月時間, 我諗只係啱啱夠...
打算每個星期六朝早走一轉長課, 每星期加10%-20%長度, 希望可以喺三星期後達到20Km長課嘅目標...

上星期聯合國兒童基金會慈善跑2009前, 心理及生理準備唔係好足夠...

成個星期都無早瞓, 休息唔夠...
心理上亦比較放鬆, 無比賽前應有嘅戰意...

星期日搭的士去南昌站轉頭班東涌線地鐵去迪士尼, 眼見有一半以上嘅乘客都係去參加慈善跑, 大家為咗做善事, 都唔怕早起身...

去到集合處, 嘩咗一聲...
天都未光, 已經人山人海...
好彩喺起跑處見到阿輝, 佢已經完成熱身, 準備7am開始嘅半馬賽事...

我見仲有成個鐘, 影咗一陣相先至換衫換鞋...
稍稍拉筋後, 慢Jog幾圈...

食完GU Energy Gel後就上線, 原來已經開始排隊, 好彩最後都可以排到較前位置, 估計第三至四行左右...

7:45am準時開始十公里賽事, 身邊跑手又係一枝箭咁向前衝, 自己當然唔執輸, 一齊衝...

頭1Km以4'05"73完成, 好快, 但心知無可能保持呢個速度捱完剩低9Km, 收慢腳步...

跑到2Km左右, 開始畀其他跑手超越, 心態亦開始動搖, 跑得咁辛苦為乜? 曾有一刻真係好想停低慢行...

去到欣澳路段, 一條長命向上暗斜, 奧運歡樂跑時已經領教過, 知道上到頂後會落斜一段, 之後U Turn回程再上斜...
雖然作好心理準備, 但係望住條長命斜, 覺得跑極都未到頂...
差唔多到頂時, 望到回程嘅4Km路標, 心知3Km路標都仲未過, 即係過咗頂位仲要跑好遠先至U Turn?!!
但過咗頂位無耐就見到3Km路標, 再跑多一小段就已經見到U Turn, 回程去到4Km路標, 只係用咗1'58"25!!!
繼續去到5Km路標, 用咗7'16"09, 好明顯路標嘅位置錯到離哂普...
返到屋企睇返GPS紀錄, 3-4Km及4-5Km都係約4'30"左右...

3-4Km途中有一個水站, 沿途分成三節...
無减慢跑速靠向水站, 第一二節都攞唔到水, 要去到第三節先至攞到, 真係搞笑, 原來保持跑速攞水都係一門學問...
其實杯水都係濕一濕口就掉咗...

原本打算要做到Sub45, 每Km平均最少4'30"...
啲路標位置錯得咁緊要, 都唔知點樣保持跑速好...

去到海岸前, 有另一水站, 但跑得離水站稍遠, 放棄攞水...

之後要經一個L型窄彎, 好彩當時無乜人, 可以順利過彎...
據聞稍候時間, 大部份半馬加十公里賽員滙合一齊後, 要排隊過呢個彎, 主於辦單位下年真係要諗諗辦法解決...

沿海岸跑, 去到香港迪士尼樂園酒店, 剩餘1Km左右, 體力開始下降...

捱到最後500m, 見到噴水池, 想再加速已經覺得力不從心...

右轉入最後150m直路, 深呼吸幾啖, 加大步幅, 勉强加速衝線...

手錶計時45'13"48, 大會時間45'17", 晶片時間45'11"...
排名(組別) 20/748, 排名(男子) 61/2577, 排名(全場) 67/4374...

相信好多高手都係參加半馬賽事, 所以我先至可以喺十公里賽事得到咁嘅排名...

雖然比兩星期前嘅香港10公里挑戰賽快咗13秒, 但感覺上今次辛苦好多...

今個星期日就係第三屆美津濃石門10公里賽, 應該會有好多高手參加...
又可以跟住阿輝跑, 戰意會高好多...

香港10公里挑戰賽之後, 上星期二開始病咗幾日, 到星期六早上先至回復練習...

雖然朝早有少少太陽, 但天氣依然好凍, 我估得12度左右...
著條3/4 Tight加長袖Tee, 跑嘅時候都仲係覺得凍, 可能未完全病好...
吸冷空氣跑都幾辛苦, 開頭幾圈熱身未夠, 好似唔係好夠氣咁...

星期日夜晚暖少少, 不過都係著條Long Tight穩陣啲, 唔想再病過...
呢晚跑得舒服啲, 雖然都係凍, 不過Long Tight可以保持下身溫度, 上身件Long Tee覺得薄咗少少, 要跑到過咗3K先至開始覺得暖...

諗返香港10公里挑戰賽當日, 自己嘅弱點好明顯係落斜...
每逢到落斜路段, 速度都及唔上其他跑手, 好容易被超越或被拋離, 真係要諗吓方法練落斜...

另一個就係步頻問題...
喺起步後頭1Km, 速度好快, 自己要用好高嘅步頻先至可以跟到其他跑手...
後來睇到師兄義務錄低接近衝線時嘅Video, 更加肯定自己嘅步頻比其他跑手為高...

雖然阿輝覺得我嘅跑姿無問題, 不過我都想練加大步幅...
步頻無咁密, 呼吸唔駛咁急, 對跑半馬以上應該有所幫助...

星期日練習時, 特意抬大腿加大步幅...
約略計算, 400m約有330至340步, 即步幅約1.18m至1.21m, 好似又幾合理...

繼星期二練習後, 又要暫停練習, 保留體力留待星期日嘅聯合國兒童基金會慈善跑2009...
不過今次阿輝跑半馬, 我就跑10Km, 各自上征途, 我無得跟住佢跑, 要自已搵個快腳師兄做領航...

香港10公里挑戰賽前一日, 天氣開始轉冷, 竟然唔小心喺呢個時候傷風, 不停打噴嚏, 即刻食粒幸福傷風素...
因為第二朝要四點半起身, 所以十點半鐘前就瞓, 瞓前再食多粒幸福傷風素...
不過因為藥力, 當晚瞓得好差, 忽冷忽熱, 醒咗幾次...
好彩起身後無再打噴嚏, 只係精神差少少...

同阿輝一齊搭N269從美孚去天水圍, 因為早咗到巴士站, 比預期搭早咗一班車, 5:15am就出發...
喺巴士食咗兩條前一日喺International買嘅壽司卷做早餐, 都幾飽, 下次可以繼續比賽前食壽司做早餐...

因為賽事封路, 架巴士唔停濕地公園站, 所以要喺天澤邨落車...
唔駛一個鐘就到咗天水圍, 天都未光...

新界區真係較凍, 得14度左右, 行咗十分鐘, 到達集合地點, 除咗工作人員外, 賽員都只係得小貓兩三隻...
天色開始漸光, 熱身前影咗幾張相留念...

o個塊集合地點又大又空曠, 地面又平, 用嚟玩飛機真係一流, 不過只可以玩電機, 因為隔一條大馬路就已經係民區...
不過呢個只係妄想, 咁近濕地公園及米埔, 無理由嘈住啲禽鳥棲息...

原本打算如果當日落雨, 會用Mizuno Wave Aero 8 Wide上場...
出門口時, 天文台顯示無雨, 決定帶ASICS SKYSENSOR BREEZE 2...

影完相後換鞋, 跟住拉筋...
6:45am後, 賽員開始相繼到達...
同阿輝喺集合地點慢Jog, 開始熱身...

Jog完一個大圈, 成身暖哂, 仲有少少汗...
同阿輝各自食一包GU Energy Gel後, 準備上線...
Jog到消防局位置, 原來有一段路封咗做熱身區...
既然天寒地凍, 再同阿輝喺熱身區Jog一段路...

到7:30am, 搵起步點, 但有工作人員攔住, 唯有企喺喥等, 再拉吓筋...
跟住見到一班人開始向上慢跑, 立即跟住尾, 原來起步點係喺向上斜嘅車路上面...
未開始比賽就已經慢跑咗三次, 天氣咁凍, 熱身多啲都係好事...

當精英賽員到齊, 我哋企嘅位置可以再度推前, 我估計我哋離起步線30m左右, 都算企得幾前...
等開跑時有少少微雨, 路面開始濕...
好彩落咗一陣就停咗, 如果唔係, 又冷又濕, 都唔知點跑...

等多10分鐘, 到八時正, 比賽正式開始...

開頭1Km, 有一段向下嘅斜路, 身邊高手個個都跑得好快, 自己亦被呢鼓氣氛帶動向前衝...
其實當時地面都幾濕, 跑得咁快要好小心, 自覺步頻頗高, 有少少跟唔上嘅感覺...
去到1Km路標, 原來只係用咗4'14"75, 對自己嚟講, 呢個步速真係好快...
同阿輝一齊開始收慢少少腳步, 步速維持4'35"左右...

當到落斜路段, 阿輝比我快少少, 距離被拉開...
但一到上斜, 我比佢又快少少, 可以追返上去平排一齊跑...
一直去到第一個U Turn, 仲可以拍住阿輝...
但過咗5Km之後, 喺一段落斜路段被佢拋離...
之後唯有自己保持步速, 捱到9Km...
一路上都不停被其他跑手超越, 自己就久唔久先至可以超越一兩個跑手...

到最後0.5Km左右, 見到向上斜路段, 估計將到終點, 用僅餘嘅力量加速, 衝上斜路...
過咗斜路盡頭, 再跑多一小段平路就係終點線, 各個跑手都用盡全力作最後衝刺, 自己亦不例外...
手錶計時為45'23"52, 大會時間45'41", 晶片時間45'24"...
排名(組別) 128/888, 排名(男子) 466/3125...

第一次參賽, 估唔到可以做到Sub46, 平時練習都只係做到Sub48...
比賽前無預期完成時間, 所以無壓力...
加上跟住阿輝跑, 放鬆心情, 反而發揮得幾好, 好彩前一日嘅傷風影響不大...