為求達到10Km可以做到Sub 45, 每星期都會計劃一日做Interval Training...

依家練Interval最快只可以做到1'42"一圈400m, 平均要1'44", 希望喺"香港糖尿聯會健康長跑"10Km賽事可以達到Sub 45...

唔知係咪大腿粗咗或練快跑時習慣提大腿, 著開o個條Nike DRI-FIT Shorts竟然磨損大脾內側...

其中一個解决方法係揸花士令, 但我又唔鍾意花士令o個種感覺...

將條短褲側邊剪開1.5吋, 令條褲有少少Split嘅效果...

聖誕日起身食咗燕麥拉麵, 過兩粒鐘先去公園跑LSD...
當日預期跑19.2Km, 但跑到一半, 已經開始覺得腳軟...
10Km時食咗一包GU Energy Gel, 但幫助不大...
到最後2Km, 要死捱先至能夠完成...
時間比上一星期慢好多, 應該係早餐唔夠飽所至...

條改Split短褲可以接受, 跑完19.2Km, 大脾內側只係有少少痛...

為咗唔想影響比賽成績, Boxing Day去買咗條Nike DRI-FIT Split Shorts...
原來褲管布料接駁位製法完全唔同, 條Split Shorts車多咗一條布邊喺接駁位, 令到褲管邊更加平滑, 減低磨擦...

星期日落場練Interval, 今次比上星期較輕易就可以保持到1'42"一圈, 有少少進步...
條Split Shorts唔錯, 無再磨大脾內側...

昨晚第一次做Tempo Training, 目標定為Pace 4'40"跑6Km, 開頭有啲擔心可唔可以做到, 但10Km比賽時能夠以平均Pace 4'30"完成, 無理由Tempo做唔到...
結果又覺得唔困難, 有兩三圈仲跑得快過Pace 4'30", 下次再加多一圈...

近排天氣凍, 夜晚得12度, 我就唔夠膽著短褲加短Tee練跑, 最主要係唔想病, 病咗就會打亂自己嘅訓練計劃...

加上天氣乾燥, 喺户外吹成粒鐘, 須然係跑o緊, 雙手依然覺得凍...

專登去Sogo買咗對Mizuno手套, 質地唔太厚, 足夠保温之餘又可以防「爆拆」...
原本諗住買黑搭黄, 可惜得番中碼, 被迫買黑搭粉紅, Sharp得嚟又幾型, 可以接受...

至於下身, 咁凍一定著Long Tight, 唔駛諗...

上身就麻煩少少, 秋天時試過著一件Long Tee跑, 件Long Tee頗為單薄, 所以覺得幾凍...

後來考慮買Mizuno BioGear, 喺Sogo試日本碼XL, 非常貼身, 著落身都有啲困難, 但係著咗包實上身又幾好Feel...
件BioGear嘅質地好薄, 好似身體第二層皮膚一樣...
可惜無減價, 二佰七十大元, 買唔落手...

跟住去咗Nike Shop, 啱啱減o緊價, 有件Nike Pro Compression Short Sleeve Crew減到$165...
搵咗L碼及XL碼入更衣室試, 原來L碼已經係腰位太濶身, 如果唔係之前試過件BioGear, 可能會揀L碼...
再搵件M碼試試, 呢件腰位貼哂, 上胸直頭有迫爆嘅感覺, 同BioGear差唔多, 決定買呢件...
Nike Pro嘅質地比BioGear厚少少, 不過耐唔耐用就暫時未知...
另外當晚試咗件Nike Long Running Tee, 可惜無新貨, 如果唔係買兩件仲可以有額外九折...

星期六朝早天寒地凍, 著Nike Pro打底, 加Long Tee及Long Tight, 起初覺得有啲凍, 跑熱咗之後就好好多...
件Nike Pro幾緊身, 吸汗之餘又唔焗, 用嚟打底保暖真係幾好...
開頭唔係好慣, 呼吸唔暢順, 習慣咗之後就無大問題, 完成17.3Km嘅計畫...

昨晚又去練6組Interval, 今次目標Pace係4'20", 一圈要比上星期快4秒, 果然辛苦好多, 都唔係每組可以達到目標, 下星期都係用番呢個Pace, 等身體適應咗再加快到4'15"...

星期六如計劃一樣, 跑咗15.3Km, 時間1hr17'28"13, 跑得稍為快咗, Pace慢少少應該較為適合, 唔會太過疲累...
今個星期六會加多一圈, 超越17Km, 不過要小心控制跑速, 唔可以跑得太快...

東亞運半程馬拉松賽事當日, 天色灰暗, 同阿輝去咗將軍澳支持香港運動員...
8:15am去到將軍澳運動場出口, 等8:30am開始嘅男子賽事...

準時聽到鳴槍, 隔咗一陣男子運動員跑出運動場, 首先見到一堆運動員領先喺前面, 跟住後面有幾位, 香港嘅陳家豪及賴學恩明顯被稍稍拋離...
第一圈回程時, 香港兩位運動員已經被拋離200m以上...

到8:45am, 女子賽事開始, 李雪菲及范瑞萍處於稍後位置...

賽事稍後時間, 天色漸好, 出埋太陽, 對運動員頗為辛苦...

最後陳家豪及李雪菲以1hr15'35"及1hr24'28"完成, 呢個成績雖然同其他選手有一段距離, 但已經相當犀利...

星期二原本打算練Interval, 但係運動場關閉, 被迫跑公園...
開跑後十分鐘, 開始落毛毛雨, 跟住越落越大...
既然已經濕咗大半, 索性堅持跑完剩下嘅路程...
啲雨水滴落頭殼, 覺得幾凍, 唯有跑快啲保持身體温暖...

昨晚天氣好凍, 著Long Tee, Long Tight及手套, 只係啱啱夠暖...
落場前背熟咗練Interval嘅計劃, 2圈Pace 4'30", 1.5圈Pace 6'00", 做六組...

由於係第一次練Interval, 所以Pace無Set得太高...
原本計劃做五組, 後來覺得仲有氣力, 所以臨場加多一組...

整體上暫時覺得練Interval唔太困難, 中間1.5圈Resting Lap有足夠時間回氣...
其實Resting Lap好難做到Pace 6'00", 因為唔慣慢跑, 通常都會跑得太快...

下星期會加快Pace到4'15", 應該會幾辛苦...

經過兩次比賽後, 上星期二跑荔枝角公園, 時間比以前快咗好多...

休息四日, 星期日一早搭頭班地鐵去石門参加第三屆美津濃石門10公里賽...

7am未夠就已經抵達, 同阿輝行去起步點望一望, 跟住返集合點攞號碼布及Sensor...

換完衫及鞋, 跟住拉筋...
集合點無洗手間, 要去到小瀝源遊樂場先至有, 索性Jog去當熱身...

當日天氣幾好, 涼涼哋, 又唔係好曬...
等到8:00am, 食GU Energy Gel, 準備上線...
估計高手雲集, 所以唔敢企得太前...

由於預計賽道較窄, 比賽一開始立即快放, 盡快遠離人群, 避免被阻塞...
策略成功, 起步500m後已經開始疏落, 但係衝得咁快嘅壞處就係氣喘, 頭1Km做到4'08"60...

跟住開始放慢, 2Km及3Km保持4'25"82及4'27"73...

過咗3Km, 開始跟唔到阿輝, 唯有自己繼續死捱...

條路好好跑, 印象中只係有兩小段斜路, 唔會太辛苦...

過咗5Km轉拆位, 稍減慢跑速到水站, 飲一小啖水...

體力開始下降, 跑速減慢到4'37"左右...

一直捱到過咗橋, 剩低1Km, 用僅餘嘅力量加速...
去到最後200m, 咬實牙關, 全力衝刺, 衝到最後10m, 差啲碌低...

手錶時間45'07"67, 大會時間45'22", 晶片時間45'06"...
排名(組別) 61/297, 排名(男子) 155/1010, 排名(全場) 163/1212...

雖然破咗自己嘅10Km紀錄, 比聯合國兒童基金會慈善跑2009快咗5秒咁大把, 但係喺咁好嘅天氣加上平路, 未能做到Sub45, 覺得好可惜, 心有不甘...
比賽後段時, 其實唔係太辛苦, 唔明白點解最後幾Km可以慢到4'37"/Km...
如果要比較, 我覺得聯合國兒童基金會慈善跑最辛苦...

昨日報咗香港糖尿聯會健康長跑2010, 可以填補美津濃香港半馬拉松錦標賽2010及2010渣打馬拉松中間嘅空檔...
呢個比賽由白石角海濱長廊起步, 經大埔吐露港緩步徑至元洲仔公園再拆返, 長度10Km, 估計大部份係平路, 呢次要作好賽前訓練, 再次挑戰Sub45...

依家要開始準備美津濃香港半馬拉松錦標賽, 得番一個月時間, 我諗只係啱啱夠...
打算每個星期六朝早走一轉長課, 每星期加10%-20%長度, 希望可以喺三星期後達到20Km長課嘅目標...

上星期聯合國兒童基金會慈善跑2009前, 心理及生理準備唔係好足夠...

成個星期都無早瞓, 休息唔夠...
心理上亦比較放鬆, 無比賽前應有嘅戰意...

星期日搭的士去南昌站轉頭班東涌線地鐵去迪士尼, 眼見有一半以上嘅乘客都係去參加慈善跑, 大家為咗做善事, 都唔怕早起身...

去到集合處, 嘩咗一聲...
天都未光, 已經人山人海...
好彩喺起跑處見到阿輝, 佢已經完成熱身, 準備7am開始嘅半馬賽事...

我見仲有成個鐘, 影咗一陣相先至換衫換鞋...
稍稍拉筋後, 慢Jog幾圈...

食完GU Energy Gel後就上線, 原來已經開始排隊, 好彩最後都可以排到較前位置, 估計第三至四行左右...

7:45am準時開始十公里賽事, 身邊跑手又係一枝箭咁向前衝, 自己當然唔執輸, 一齊衝...

頭1Km以4'05"73完成, 好快, 但心知無可能保持呢個速度捱完剩低9Km, 收慢腳步...

跑到2Km左右, 開始畀其他跑手超越, 心態亦開始動搖, 跑得咁辛苦為乜? 曾有一刻真係好想停低慢行...

去到欣澳路段, 一條長命向上暗斜, 奧運歡樂跑時已經領教過, 知道上到頂後會落斜一段, 之後U Turn回程再上斜...
雖然作好心理準備, 但係望住條長命斜, 覺得跑極都未到頂...
差唔多到頂時, 望到回程嘅4Km路標, 心知3Km路標都仲未過, 即係過咗頂位仲要跑好遠先至U Turn?!!
但過咗頂位無耐就見到3Km路標, 再跑多一小段就已經見到U Turn, 回程去到4Km路標, 只係用咗1'58"25!!!
繼續去到5Km路標, 用咗7'16"09, 好明顯路標嘅位置錯到離哂普...
返到屋企睇返GPS紀錄, 3-4Km及4-5Km都係約4'30"左右...

3-4Km途中有一個水站, 沿途分成三節...
無减慢跑速靠向水站, 第一二節都攞唔到水, 要去到第三節先至攞到, 真係搞笑, 原來保持跑速攞水都係一門學問...
其實杯水都係濕一濕口就掉咗...

原本打算要做到Sub45, 每Km平均最少4'30"...
啲路標位置錯得咁緊要, 都唔知點樣保持跑速好...

去到海岸前, 有另一水站, 但跑得離水站稍遠, 放棄攞水...

之後要經一個L型窄彎, 好彩當時無乜人, 可以順利過彎...
據聞稍候時間, 大部份半馬加十公里賽員滙合一齊後, 要排隊過呢個彎, 主於辦單位下年真係要諗諗辦法解決...

沿海岸跑, 去到香港迪士尼樂園酒店, 剩餘1Km左右, 體力開始下降...

捱到最後500m, 見到噴水池, 想再加速已經覺得力不從心...

右轉入最後150m直路, 深呼吸幾啖, 加大步幅, 勉强加速衝線...

手錶計時45'13"48, 大會時間45'17", 晶片時間45'11"...
排名(組別) 20/748, 排名(男子) 61/2577, 排名(全場) 67/4374...

相信好多高手都係參加半馬賽事, 所以我先至可以喺十公里賽事得到咁嘅排名...

雖然比兩星期前嘅香港10公里挑戰賽快咗13秒, 但感覺上今次辛苦好多...

今個星期日就係第三屆美津濃石門10公里賽, 應該會有好多高手參加...
又可以跟住阿輝跑, 戰意會高好多...

香港10公里挑戰賽之後, 上星期二開始病咗幾日, 到星期六早上先至回復練習...

雖然朝早有少少太陽, 但天氣依然好凍, 我估得12度左右...
著條3/4 Tight加長袖Tee, 跑嘅時候都仲係覺得凍, 可能未完全病好...
吸冷空氣跑都幾辛苦, 開頭幾圈熱身未夠, 好似唔係好夠氣咁...

星期日夜晚暖少少, 不過都係著條Long Tight穩陣啲, 唔想再病過...
呢晚跑得舒服啲, 雖然都係凍, 不過Long Tight可以保持下身溫度, 上身件Long Tee覺得薄咗少少, 要跑到過咗3K先至開始覺得暖...

諗返香港10公里挑戰賽當日, 自己嘅弱點好明顯係落斜...
每逢到落斜路段, 速度都及唔上其他跑手, 好容易被超越或被拋離, 真係要諗吓方法練落斜...

另一個就係步頻問題...
喺起步後頭1Km, 速度好快, 自己要用好高嘅步頻先至可以跟到其他跑手...
後來睇到師兄義務錄低接近衝線時嘅Video, 更加肯定自己嘅步頻比其他跑手為高...

雖然阿輝覺得我嘅跑姿無問題, 不過我都想練加大步幅...
步頻無咁密, 呼吸唔駛咁急, 對跑半馬以上應該有所幫助...

星期日練習時, 特意抬大腿加大步幅...
約略計算, 400m約有330至340步, 即步幅約1.18m至1.21m, 好似又幾合理...

繼星期二練習後, 又要暫停練習, 保留體力留待星期日嘅聯合國兒童基金會慈善跑2009...
不過今次阿輝跑半馬, 我就跑10Km, 各自上征途, 我無得跟住佢跑, 要自已搵個快腳師兄做領航...

香港10公里挑戰賽前一日, 天氣開始轉冷, 竟然唔小心喺呢個時候傷風, 不停打噴嚏, 即刻食粒幸福傷風素...
因為第二朝要四點半起身, 所以十點半鐘前就瞓, 瞓前再食多粒幸福傷風素...
不過因為藥力, 當晚瞓得好差, 忽冷忽熱, 醒咗幾次...
好彩起身後無再打噴嚏, 只係精神差少少...

同阿輝一齊搭N269從美孚去天水圍, 因為早咗到巴士站, 比預期搭早咗一班車, 5:15am就出發...
喺巴士食咗兩條前一日喺International買嘅壽司卷做早餐, 都幾飽, 下次可以繼續比賽前食壽司做早餐...

因為賽事封路, 架巴士唔停濕地公園站, 所以要喺天澤邨落車...
唔駛一個鐘就到咗天水圍, 天都未光...

新界區真係較凍, 得14度左右, 行咗十分鐘, 到達集合地點, 除咗工作人員外, 賽員都只係得小貓兩三隻...
天色開始漸光, 熱身前影咗幾張相留念...

o個塊集合地點又大又空曠, 地面又平, 用嚟玩飛機真係一流, 不過只可以玩電機, 因為隔一條大馬路就已經係民區...
不過呢個只係妄想, 咁近濕地公園及米埔, 無理由嘈住啲禽鳥棲息...

原本打算如果當日落雨, 會用Mizuno Wave Aero 8 Wide上場...
出門口時, 天文台顯示無雨, 決定帶ASICS SKYSENSOR BREEZE 2...

影完相後換鞋, 跟住拉筋...
6:45am後, 賽員開始相繼到達...
同阿輝喺集合地點慢Jog, 開始熱身...

Jog完一個大圈, 成身暖哂, 仲有少少汗...
同阿輝各自食一包GU Energy Gel後, 準備上線...
Jog到消防局位置, 原來有一段路封咗做熱身區...
既然天寒地凍, 再同阿輝喺熱身區Jog一段路...

到7:30am, 搵起步點, 但有工作人員攔住, 唯有企喺喥等, 再拉吓筋...
跟住見到一班人開始向上慢跑, 立即跟住尾, 原來起步點係喺向上斜嘅車路上面...
未開始比賽就已經慢跑咗三次, 天氣咁凍, 熱身多啲都係好事...

當精英賽員到齊, 我哋企嘅位置可以再度推前, 我估計我哋離起步線30m左右, 都算企得幾前...
等開跑時有少少微雨, 路面開始濕...
好彩落咗一陣就停咗, 如果唔係, 又冷又濕, 都唔知點跑...

等多10分鐘, 到八時正, 比賽正式開始...

開頭1Km, 有一段向下嘅斜路, 身邊高手個個都跑得好快, 自己亦被呢鼓氣氛帶動向前衝...
其實當時地面都幾濕, 跑得咁快要好小心, 自覺步頻頗高, 有少少跟唔上嘅感覺...
去到1Km路標, 原來只係用咗4'14"75, 對自己嚟講, 呢個步速真係好快...
同阿輝一齊開始收慢少少腳步, 步速維持4'35"左右...

當到落斜路段, 阿輝比我快少少, 距離被拉開...
但一到上斜, 我比佢又快少少, 可以追返上去平排一齊跑...
一直去到第一個U Turn, 仲可以拍住阿輝...
但過咗5Km之後, 喺一段落斜路段被佢拋離...
之後唯有自己保持步速, 捱到9Km...
一路上都不停被其他跑手超越, 自己就久唔久先至可以超越一兩個跑手...

到最後0.5Km左右, 見到向上斜路段, 估計將到終點, 用僅餘嘅力量加速, 衝上斜路...
過咗斜路盡頭, 再跑多一小段平路就係終點線, 各個跑手都用盡全力作最後衝刺, 自己亦不例外...
手錶計時為45'23"52, 大會時間45'41", 晶片時間45'24"...
排名(組別) 128/888, 排名(男子) 466/3125...

第一次參賽, 估唔到可以做到Sub46, 平時練習都只係做到Sub48...
比賽前無預期完成時間, 所以無壓力...
加上跟住阿輝跑, 放鬆心情, 反而發揮得幾好, 好彩前一日嘅傷風影響不大...

用ASICS SKYSENSOR BREEZE 2跑過三次之後, 覺得對鞋偏向Racing多過Training, 跑完10Km後, 前掌有少少痛...
而且對鞋咁貴, 唔惜得經常用嚟做Training...

星期六去咗沙田行街, 順手搵對Training跑鞋, 試咗ASICS LYTERACER HS 2及ASICS GELFEATHER GS 2...

LYTERACER藍色底色, 好型, 可惜鞋底偏硬而且鞋身較Slim, 覺得唔係咁適合做Training...

GELFEATHER GS 2係新版, 上星期喺旺角都仲係賣o緊舊款, 不過新版嘅藍色好似無舊款咁靚...
呢對比LYTERACER重少少, 但感覺上保護性强好多...
喺運動鋪內稍稍試跑, 感覺腳掌及腳踭鞋底幾軟, 鞋唔算太修身, 我隻闊腳還可以接受, 一於帶對鞋返屋企...

星期日去完九龍公園攞香港10公里挑戰賽號碼布後, 去咗海運大廈Gigasport, 原來憑Coupon買Mizuno產品有八折, 想試Mizuno Wave Spacer RS4 Wide, 又係無27碼, 唯有睇跑衫及跑褲...
試咗一條Long Tight, 港版M碼太長及稍鬆, 迫住買日版M碼, 最後再揀多件跑衫...

行咗兩日街, 腳都軟, 但有新鞋玩, 當晚跑場試試...
對GELFEATHER GS 2真係幾淋, 260g重, 輕身得嚟保護性又唔錯, 如果著多幾次, 覺得無問題, 會考慮用嚟跑半馬...

原本星期日喺Nike Shop睇中咗一條Nike尼龍長跑褲, 無折, 所以無試...
星期一去咗時代試, 可惜大脾位頗窄, 用o黎做Gym還可以, 跑步就唔係咁啱...

索性去GigaSport試3/4 Tight, 我覺得會越洗越鬆, 而且據聞著Tight要越緊身越好, 所以今次買咗條港版S碼...

今個星期日就係香港10公里挑戰賽, 所以自星期三慢跑完4Km之後, 全面休息, 每晚冰敷阿基里斯腱及拉筋, 依家只係希望當日唔好落雨...
至於著Mizuno Wave Aero 8 Wide或BREEZE 2, 就要睇當日天氣而定...

喺札幌嘅時候, 去咗幾間運動用品店鋪, 搵Phiten頸繩及跑鞋...

Mizuno喺日本賣得好貴, Mizuno Wave Aero 8 Wide要港幣800元以上, 果然係日本名牌...

一心去搵日本製ASICS SKYSENSOR JAPAN, 可惜第一晚搵唔到有特價貨...
到最後一日買手信前, 再睇番o個幾間運動鋪, 終於發現到有一款SKYSENSOR JAPAN做緊特價, 仲係Wide版及有27碼, 價格約港幣900元左右...
試穿後, 鞋型好Fit, 但覺得鞋底偏硬, 無網友們講到咁舒服, 試咗10分鐘, 都係心大心細, 唔知買唔買好...
最後都係決定放棄, 因為如果著住跑得唔舒服, 咁就會浪費咗對鞋...
打消念頭後, 都有少少失落, 咁辛苦搵到對鞋, 點知原來唔適合自己...

返到香港, 諗過Nike嘅LunarGlide+, 好似幾好...
去Nike Shop試試, 點知鞋頭內有一塊膠片狀嘅物體, 行路時會「桔」腳掌前部, 唔敢想像點樣用嚟跑步...
後踭感覺上係斜向外側, 古古怪怪...
對鞋都唔輕, 估計有300g...
呢對鞋設計好差, 試完之後, 我覺得Nike啲鞋真係只可以用嚟出街著...

後來去Sogo試ASICS SKYSENSOR BREEZE 2...
第一個感覺係無預期中咁軟, 但對鞋好Fit自己嘅腳型, 唔需要3E闊嘅Wide版...
跟住再試ASICS TARTHER RS ALIVIO 2, 雖然呢對係中國製, 但一著落腳, 覺得好舒服, 軟得嚟又貼腳, 真係好心動, 難怪咁多跑手推崇備至...

諗咗幾日, 上星期六去運動國問吓老板意見, 佢解釋未必每個人都適合著Flat Type嘅SKYSENSOR BREEZE系列, 要睇個人嘅跑步習慣及特性...
我自己著開Spring Type嘅Aero 8及ASICS GEL-INFINI, 記得喺Sogo試著SKYSENSOR BREEZE 2又真係有少少怪怪哋嘅感覺...
聽老板咁講, 真係要認真考慮買Spring Type嘅TARTHER, 定係Flat Type嘅SKYSENSOR BREEZE 2...

當日阿輝原來都係喺旺角, 咁就同佢一齊去體運城睇睇, 反正運動國無27碼黃黑色SKYSENSOR BREEZE 2...

去到體運城, 二話不說, 阿輝先試SKYSENSOR BREEZE 2, 佢話整體感覺唔錯...
跟住到我試, 同上一次一樣, 覺得好Fit, 尤其係我隻稍大嘅左腳, 今次反而無咗上次o個種怪怪嘅感覺, 可能著咗跑步襪, 更加合適...

既然有心買, 就試埋TARTHER TS ALIVIO 2 WIDE, 呢款係Training Specification, 橡膠底, 同上次試嘅RS石墨底唔同...
第一個感覺係個底好硬, 而且鞋頭有少少撓起...

再試TARTHER RS ALIVIO 2, 阿輝話呢個就係佢o個對TARTHER嘅感覺, 鞋底比較軟而且好Fit腳型...
但係我仲好記得佢o個對TARTHER嘅下場, 成個鞋踭嚴重斜埋一邊, 耐用性認真麻麻, 一對Racing鞋係唔需要長壽...

最後決定揀SKYSENSOR BREEZE 2, 試試Flat Type, 睇吓啱唔啱自己...
我哋兩個喺體運城玩足廿幾分鐘, 售貨員依然無面黑, 直得一讚...

星期六朝跑完15Km, 原本無打算星期日跑, 不過有新裝備, 點都要喺荔枝角公園跑10Km測試一下...

起初感覺係估唔到緩震效能唔錯, 跑嘅時候比試著時軟, 有驚喜...
對鞋得217g, 好輕盈, 但跑凹凸石磚路面覺得好穩定...

唔知係咪體能未恢復, 跑速只能達到Easy Run嘅速度...
而且左腳腳腕及右腳Achilles腱隱隱作痛, 有少少膽心買錯鞋...

經過兩晚冰敷, 星期三終於有機會同阿輝一齊落場練習...
起初設定Pace為5'04", 點知第一圈已經跑到4'50"96, 比自己平常練習嘅速度快...
雖然係跑快咗, 但又唔覺得無氣無力, 同阿輝一齊跑果然唔同啲...
對SKYSENSOR BREEZE 2用喺場仲舒服, 比Mizuno Aero 8更穩定...
跑到最尾一圈, 大家再度發力, 不過好明顯自己體力不繼, 到最後100m已經無法並排前進, 阿輝嘅耐力及爆炸力比我好好多...
最後成績47'39"64, 估唔到咁快就可以特破48'關口...

如果步幅可以練到好似阿輝一樣咁闊, 步頻唔駛咁密, 跑起上嚟應該會舒服啲...

下星期日就係香港10公里挑戰賽09, 由依家開始, 都唔會再次出力快跑, 只會以平時速度練習, 保持體力, 避免受傷...

Nike+ The Human Race 10K前一晚, 計劃策略如何如何...
不過一落到場, 第一個熱身圈已經跑得頗快, 之後減慢少少, 避勉過早消耗太多體力, 一直保持1'56"至1'58"一圈...
到第12個圈左右, 開始覺得呼吸不順, 體力下降, 跑速減到1'59"至2'01"一圈, 一直捱到最尾一圈再次發力, 最後以49'22"26完成...

雖然已經係今季最好成績, 但未能衝破49', 有少少失望...
以香港區計算得到第八名, 其實應該Ban係第八, 我係第九, 因為我隻Sportband計咗10.09Km , 佢隻計咗少過10Km, 以自己手錶計算, Ban係快過我, 不過大家都係Just For Fun, 無乜所謂...
至於以全球成績計算, 名列第3371位...

星期一重陽節假期, 四點鐘去咗跑公園, 太陽咁早就開始落山...
當日打算玩LSD, 鍛鍊耐力, 開始準備出年嘅渣打半馬...
最後以輕鬆嘅心情完成15.3Km, 1hr22'32"26, 5'23"68/Km...
如果以呢個速度, 捱多6Km, 兩個鐘內完成半馬應該唔係難事, 可能可以提高目標到1hr55'...

昨日晚飯前跑場, 第一圈2'03"33, 好鬼慢...
第二圈發力, 一直維持1'57"左右一圈...
跑到一半已經覺得可以PB, 催迫自己保持速度...
去到尾四圈, 體力用得八八九九, 堅持再度發力, 以48'44"53完成...
當初我以為會比上次紀錄快半分鐘, 原來只係快咗8秒...
要衝破48分鐘, 真係唔易...

明日打算再挑戰15Km, 希望時間可以快少少, 咁下星期可以計劃加多2Km...

上星期五跑場, 頭幾圈可以保持2分鐘內, 而且覺得筋腱及肌肉無乜投訴, 條氣又越跑越順, 繼續保持速度, 最後以49'34"18完成, 估唔到體能咁快就可以回復到...

不過要跑到好成績, 好大因素係要睇狀態...
以自己而言, 狀態好唔好, 跑完頭幾圈就可以知道...

好似今個星期一, 可能熱身拉筋時間唔夠, 一開始大腿內側已經痛, 想跑快啲都唔得, 幾圈之後就知道當日要放鬆嚟跑, 順手衡量吓以約2'05"-2'10"一圈嘅速度, 可唔可以完成半馬...
當晚覺得以呢個速度完成10Km都頗為輕鬆, 所以決定跑多2Km鍛鍊耐力, 不過跑咗30個圈, 悶到傻...

上星期六阿輝告知12月有Mizuno十公里賽事...
Mizuno喎, 梗係要支持喇, 不過星期二先至記得寄Form, 唔會咁快滿額啩...

出年1月又有Mizuno半馬賽事, 呢個我唔打算參加, 留待渣打馬拉松先至獻出第一次半馬...

明日就係Nike+ Human Race 10K, 全球Nike+用家都可以喺明日跑10Km用作跑步成績, 雖然無乜特別意義, 不過我都會参與...
但係得自己一個人跑, 無其他跑手推動, 預期都唔會跑得好快...

喺北海道返嚟之後, 跑咗三次場一次街...

10Km時間開始可以51分內完成, 不過要Sub 50, 仲係有少少難度, 睇嚟要過多一排, 身體至可以調節得到...

今個星期二開始, 開始接受2010渣打馬拉松報名...
Ban當晚立即報名全馬, 我就翌日報半馬, 阿輝都將會報半馬...

起初都有考慮報10Km或半馬...
覺得自己嘅能力, 以慢跑步速, 應該勉强可以完成半馬, 所以最後決定挑戰自己, 參加半馬賽事, 暫時目標係Sub 2完成...
不過半馬起步地點及時間係尖沙咀及6:00am, 咁咪最遲要4:00am起床!!! 有啲攞苦嚟辛嘅感覺...

等身體好啲, 就會開始每兩星期一日嘅長課, 鍛鍊自己嘅耐力, 而且要練多啲斜路, 據聞入西隧後, 就係惡夢嘅開始...

唔經唔覺, 五日嘅北海道之旅已經完結...
有啲後悔玩得太短時間, 加多兩日的話, 可以留多啲時間喺札榥及可以自駕去多一個地區...

今次旅程, 天氣比預期中好, 四日有太陽, 不過從美瑛自駕回札榥o個三個鐘, 就非常大雨...

北海道秋天時份, 四點鐘就間始天黑, 所以要把握時間, 盡早完成重要嘅景點...

至於温度, 有太陽晒時就幾熱, 一件短Tee就可以...
不過一到日落後, 要加多件長恤衫...
喺美瑛o個半日, 天陰陰, 又大風, 要加埋件Jacket先至夠...

由於大部份時間太陽猛, 光線反差强, 好難影到靚相, 尤其係啲紅花及黃花, 好多都係「爆」, 無哂層次感, 超越咗部老爺Nikon D70 CCD嘅Dynamic Range...
其實出發之前, 都有諗過索性換部Nikon D700, 不過D700已經出咗一年, 而且D700係第一代平價版Full Frame DSLR (雖然係平價版, 售價都要接近二萬元), 都係等下一代比較好啲...

影咗差唔多千三張相, 不過大部份都係普通相, 真正有用心機及效果埋想嘅, 數量不多...
我諗揀相及修整都要花一個月時間, 加埋剪DV嘅Video, 有排玩...

捱咗5年, 返埋聽日工, 終於可以連續放9日假期...

身邊嘅政府工務員同事, 個個都有百幾日假期喺手, 福利好到喺出面幾乎無可能搵到...
有時諗都唔知可以繼續捱到幾時, 轉工又搵唔番咁嘅人工, 但依家又差唔多係無福利, 好似隻牛咁, 死做無得停...

去旅行嘅準備已經搞得八八九九, 應該要知嘅資料已經睇哂, 剩番呢幾日會再返睇旅遊書及盡量休息多啲...

諗起架bB, 原來除咗係軚波外, 仲係"Foot Brake"...
好彩有高人指教, 作好心理準備...
始終都係絕少揸自動波車, 操作上唔係咁熟識...

依家只係希望下星期前感冒可以完全康復...
重有最緊要係北海道天氣良好, 可以影到靚相...

八月中買咗Nike+ SportBand, 有新玩具玩, 曾試過一個星期跑六日, 剩番一日用嚟做Gym, 運動量加大咗好多...

個Sensor依靠鞋底接觸地面時間嚟計算跑速, 所以一個穩定嘅跑姿可以增加量度跑步距離嘅準確性...
基於以上原因, 唔同嘅鞋款, 會得出唔同嘅量度距離, 每一款鞋最好都係Calibrate一次, 所以索性買多粒Sensor, 一粒用喺Mizuno Wave Aero 8 Wide, 另一粒用喺ASICS GEL-INFINI, 每對Calibrate一次, 一勞永逸...

經過Calibration後, 準確程度都算唔錯, 約5%之內...

每次跑完之後, 上載數據到Nike+ Server, 自動繒畫圖表, 觀察跑步狀態, 不過對我無乜用, 因為我一向用Casio W-752-9BVDF計時及記錄數據...
Nike+亦可以幫助設定目標或參加挑戰, 增加跑步嘅樂趣...

10月24日係Nike+ Human Race 10K, 全球嘅Nike+用家可以喺當日跑10Km作比賽紀錄, 雖然唔係正式比賽, 不過我都會参加...

今年無咗"Nike 10公里挑戰賽", 但保留咗"香港十公里挑戰賽"...
雖然Nike無冠名, 但繼續贊助Nike紀念T-Shirt...
基於Nike嘅餘威, 網上報名嘅名額一日內就已經爆滿, 好彩阿輝同我都可以未夠早上9點鐘就完成登記, 到時5000人一齊比賽, 應該會好好玩...

自從六月尾後, 磅數都係保持喺152磅左右, 對自己嚟講, 呢個磅數已經可以接受, 太瘦變成瘦义燒就唔係咁好睇...

整個八月, 跑咗超過170Km, 比七月多咗四份一...
但跑步過多嘅後遺症就係肌肉疲勞, 所以步入九月份, 跑步次會減到每星期三至四次, 及盡量唔會連續跑三日...

依家每次最少都會跑10Km, 時間保持50-52分鐘, 跑得最快o個次係48'52"42, 呢個記錄要留待北海道遊後先至會嘗試打破...

跑埋今個星期, 下個星期會轉玩Jogging, 保持腳部體能, 避免受傷...
如果傷咗先至去旅行, 咁就大件事...

第四日遊覽美瑛嘅行程已經決定咗...

當日會好早起身, 沿"花人街道國道237"慢跑半個鐘, 欣賞晨早嘅"十勝岳", 之後返酒店浸溫泉, 再食日式早餐...

首先會去"深山峠展望台"睇風景, 跟住走一轉"廣角之路"睇花及草原, 再到"拼布之路"睇樹...
據聞日本Local Tour可以用大約三個多鐘睇完主要景點, 不過我覺得會頗怱忙, 我會預用五個鐘, 優哉游哉...

至於當日嘅午餐, 打算去到邊食到邊, 未有特定地點...

下午稍後時間會經旭川返札榥, 去"白之戀人朱古力工場"望一望, 之後就要返"札幌京王酒店"還車...

其實啲時間只係啱啱好, 希望唔會行錯路浪費時間...

如果當晚仲想食蟹, 可以到"蟹將軍"食蟹宴; 又或者可以嘗試其他拉麵...

第五日就係自由時間, 會係第四晚做決定, 睇吓有乜嘢地方想去...

對Mizuno Wave Aero 8 Wide捱多兩三個月, 應該係時候退休, 依家搵定鞋都差唔多...
日版ASICS Skysensor香港賣緊$1200左右, 如果喺日本搵到減價, 咁就發達囉...

喺東X遊租咗架bB之後, 有一晚放工時忽然諗起架bB係自動波...
雖然考完車牌後, 一直都係揸棍波車, 揸自動波都唔知有冇五次, 今次喺北海道自駕揸自動波應該唔會有問題...
但係... bB應該係軚波, 大鑊...

今次真係掛萬漏一, 從來都未試過揸軚波車, 操作上都唔知點搞...
我諗都要花少少時間研究點樣入波, 如果問交車職員, 都唔知可唔可以溝通得到, 最怕係想入D波但入錯咗R波...
打算一個D波由札幌一直揸到去富良野, 搵塊空地停低先至再慢慢研究...

依家頭三日行程已經搞掂...

第一日凌晨機到東京羽田, 轉內陸機到札幌; 當日會先去"千歲Outlet"打個轉及食Lunch, 再搭JR到札幌駅, 然後到"札幌京王酒店"Check-in, 跟住到各大商場逛逛, 晚上會食蟹放題做晚餐...

第二日到札幌市內名勝影吓相, 跟住到"二条市場"或"場外市場"食魚生飯, 然後搭JR到小樽, 遊覽小樽名勝, 當然唔少得嘆下午茶、食雪榚及最緊要嘅小樽壽司, 如果仲食得落, 返到札幌再食拉麵...

第三日要早啲起身, 準時八點攞車出發去富良野, 其中會停一停芦別市休息一陣; 當日主要遊覽中富良野及上富良野各花田, 如果當時真係無哂花, 都可以去"日の出公園"及"千望峠駐車公園"望吓山及草原遠景, 最後返中富良野食蜜瓜雪榚, 之後到酒店Check-in, 如果有時間, 可以浸完私家溫泉就食日式晚飯, 臨瞓前又可以浸多一次...

至於第四日, 打算遊覽美瑛嘅"拼布之路"及"廣角之路", 但由於景點衆多, 要揀選其中一部份, 唔想太過怱忙...

今日會繼續諗行程, 預期今個星期內就可以搞掂...

等咗好耐, 都等唔到ToCoo!出十月份嘅租車價格...

最初係打算租架Mazda Demio就算, 無乜要求, 平平哋, 預8000至10000円...
但後來覺得取車店鋪離酒店有一段距離, 估計要行10至15分鐘, 拖住個o急行咁遠都唔係咁好玩...

後來發覺東X遊可以代安排租Toyota車, 取車店鋪仲係喺正酒店裏面, 價格算合理, 因為租Toyota車一向都係較貴, 要14000円左右...
依家搵東X遊幫手租咗架bB, 連英文發音GPS, 都只係HKD1000, 絕對可以接受, 如果架bB係新版咁就仲正...

幾日後, ToCoo!出咗十月價格, 心諗有無咁黑仔, 畀哂錢先至出新價格...
一如所料, ToCoo!要14858円先至可以租到1300cc Toyota車, 好彩無決定錯誤...

之前Bookmark咗嘅遊記差唔多睇哂, 其他資料亦已經收集得八八九九...
九月會開始重新整理行程, 再深入研究各間食肆 (其實只係唔識日文, 要睇定菜牌, 預早翻譯, HaHa)...

Nike+ SportBand第二代已於今個星期一喺香港發售...

屋企到荔枝角公園嘅路段有約1Km係喺大廈旁邊, 所以Qstarz BT-Q1300嘅記錄經常會有所偏差...
通常尾段會到鄰近屋苑慢跑多一圈作Cool Down, 呢一段路有樹蔭, 所以接收較差...

由於以上原因, 決定買Nike+ SportBand, 唔駛再憂慮接收問題, 及打風落雨都唔怕...

星期二拜托Ban幫我買, 依家暫時得黃色, 其實都無乜所謂, 反正啲顏色係底色, 唔多覺眼...

最大問題係點樣將粒Sensor綁喺鞋面, 試用雙面貼黐一個金钃扣, 今晚如有時間可以試跑10圈400m, 睇吓準唔準確...
如果唔準確, 可以用Nike+ Utility做Calibration, 都幾方便...

上兩個星期「聯合國兒童基金會慈善跑2009」開始接受報名...
諗咗幾日, 究竟参加10Km定係半馬?

以現時狀態, 跑10Km絕無問題...
「無問題」嘅意思係可以唔駛停低慢行, 可以Keep住跑完10Km, 時間就盡力而為...

至於半馬, 暫時都未係時候, 就算膽粗粗參加, 多數都係半跑半行, 無乜意思...

最後都係決定報10Km, 睇吓自己跑10Km嘅實力...
阿輝就報半馬, Ban應該會參加日本富士山全馬...

如果幸運報到「Nike香港十公里挑戰賽」, 呢個會係自己第一個10km賽事, 兩星期後先至到「聯合國兒童基金會慈善跑」...

今個月開始每次加里數到8.8Km, 如果狀態良好就用正常步速完成, 反則加5至10秒一圈...
打算每個星期六都去荔枝角公園跑LSD, 鍛鍊耐力, 希望可以逐漸加到完成15Km以上...

近排都係Keep住一星期跑4次, 成績唔覺有明顯進步...
有時仲覺Hamstrings及Quadriceps抽住抽住, 想發力都唔得...
睇嚟都係要專注長度訓練, 好過强度訓練...

最尾兩Laps已經再無衝圈, 肌肉疲勞下再强行爆發力量, 好易令到肌肉過度疲累...
依家最多只係稍稍加速, 每圈快5秒左右就算...

前個星期六日連跑兩日公園, 隔一日跑Treadmiller, 再隔兩日先至跑場, 八日無拉筋, Hamstrings及Gastrocnemius明顯覺得好緊, 跑得好唔自在...
第二晚再跑場, 覺得輕鬆咗好多, 力量亦已回復, 能用正常步速完成8Km...

星期六晚心血來潮, 攞咗阿輝畀我o個隻2.4GHz心跳帶連手錶出嚟, 隻錶放咗喺枱面個幾月都未玩過...

其他Polar Compatible心跳帶用Radio Freqency傳送資料, 但較易受干擾令到心跳資料錯誤, 例如當有其他跑手用RF心跳帶在附近一齊跑...
我以前o個隻CICLO SPORT CP 12C就有呢個問題, 最高心跳率可以高達二百幾, 有無搞錯?!!
用2.4GHz就好好多, 初次設定要做Pairing動作, 減少傳送資料錯誤嘅機會...

當晚平均心跳率160bpm, 最高182bpm...
比起幾個月前嘅慢跑平均心跳率達到172bpm, 依家跑快10秒都只係160bpm...
依家靜止狀態時, 心跳可以低到45bpm, 幾個月前係55bpm, 心臟功能强化咗好多...

整個星期都好忙咁搜集北海道嘅資料...

之前一直都有Keep住睇旅遊Forum, 睇到一啲有用嘅資料就會Bookmark起...
依家慢慢睇番, 有需要保留嘅就Copy落Spreadsheet, 留待出發前再翻睇...

另外亦Bookmark咗好多遊記, 全部都係實戰經驗, 對計畫行程好有用...

札幌及小樽有咁多好味道嘅食物, 只係擔心有無時間試得哂...
加上富良野嘅雪糕及蜜瓜, 想唔肥都好難...

相比起台北嘅小吃, 真係一天一地, 當然, 價格亦都係一天一地...
到依家諗起o個啲炸雞塊、胡椒餅及大餅包餅小餅, 都仲係覺得好飽, 我諗我以後都唔敢再食...
不過對台灣嘅麵線就好受落, 阿宗麵線及蚵仔麵線真係食過翻尋味...

離北海道之旅仲有兩個月, 國際車牌已經收到, 不過ToCoo!租車優惠啱啱過咗, 睇嚟要等暑假後先至Book車...

之前買咗兩本中文旅遊書, 未有時間睇...
發覺真係好難抽到時間坐定定睇書, 以前儲起嘅攝影、健身、飛機、跑步文章及書等, 好多都只係擺咗喺喥封塵; 小說就好啲, 除咗上年喺台灣買o個兩本超悶小說外, 其餘小說都可以完成...

前兩日喺日文書店買咗本日文北海道旅遊書, 好彩間書店仲有僅餘一本, Sogo已經賣斷市, 仲唔知幾時返貨...
雖然係日文, 但睇圖畫及相片都已經好開心, 最緊要係景點嘅電話號碼或Map Code, 揸車用GPS領航好有用...

依家要開始認真搜集資料及計劃行程...
最主要係富良野及美瑛, 景點眾多, 又要趕返旅店吃日式晚餐, 時間上比較難預算...
由於花期已過, 可能揀選一至兩個花田, 睇吓花，睇吓樹，食吓雪糕及蜜瓜，悠悠閒閒...
晚上可以浸私家露天溫泉, 早啲瞓，早啲起身, 喺旅店附近跑半個鐘, 再浸溫泉, 跟住食日式早餐, 然後Check-Out, 咁就Perfect...

除咗富良野, 今次會去小樽, 預算會用一日時間, 到處隨便走走...
當然唔少得品嘗出名嘅小樽壽司, 真係諗起都流口水...

至於喺札幌, 預計唔會買到太多嘢...
最有機會係千歲Rera Outlet, 希望可以買到Casio G-Shock、Timberland及ASICS...
亦計畫食蟹宴, 雖然自己對蟹無乜特別喜好, 但一場去到, 點都要試吓毛蟹...

北海道地大, 有幾個城市都幾值得去睇睇, 可惜假期唔長, 唔夠時間去層雲峽睇紅葉及旭川睇企鵝, 唯有留番下次再計劃自駕遊睇雪景...

星期日戴咗阿輝隻405落場, 跑到最尾第三個圈㩒Lap掣, 錶面無喇喇白哂, 㩒掣都無反應...
起初以為無電, 返到屋企义完電都係唔掂, Hardware Reset又無反應, 我估係㩒掣時有手汗入咗錶內部...
希望阿輝可以整得番, 唔好浪費咗隻錶...

新一代Nike+ SportBand已經於星期三推出, 比預期快咗半年...
外型及功能同第一代好似無大分別, 但據稱LCD及防水加强咗...
我諗好快就會有貨到香港, 只差在顏色齊唔齊...

Garmin Forerunner 310XT亦將於下月推出, 50米防水, 下雨天都唔怕, 跑步點大汗都唔駛驚, 可以做到全天候GPS Logger...
唯一缺點係體積稍大, 不過男人戴就無乜所謂...

兩款差唔多時間出, 唔知揀邊樣好...
Nike+較輕便, 但計唔到Lap Time同埋要加Sensor落鞋面...
310XT功能全面, 可以加埋心跳帶, 記錄心跳情况, 但好似戴住個四方果啫喱喺手腕...

好大可能兩款都買, 兩樣同時戴, 到時跑步就好似一個Robocop咁, 成身都係電子儀器...

依家每次落場都係跑8Km, 步速有所進步, 諗住都係時候試吓跑10Km...

星期六一早起身, 仲早過平日返工...
食幾片麵包, 坐一陣, 喺屋企拉筋...

落到屋企樓下, 打開Qstarz BT-Q1300及Garmin Forerunner 405, 跑去荔枝角公園...
天氣都幾好, 間中有太陽, 可能已經習慣咗熱天氣, 唔覺熱得好辛苦...

由於打算當日跑10K, 所以開始時刻意留力, 盡量跑得輕鬆啲, 估唔到頭兩圈嘅時間都唔錯...
第三圈開始體力下降, 慢咗十幾秒...
第四圈再度發力, 仲快過第二圈...

跑完四圈公園, 回頭返屋企, 405顯示約9.8Km, 決定再圍繞隔鄰屋苑跑一圈約850m...

返到屋企睇時間, 10K用咗大約53分半左右...
第一次試跑, 未掌握到節奏, 而且公園內上斜落斜, 急彎又多, 做到呢個時間都算可以...
遲啲試吓落場跑10K, 睇吓成績又如何, 不過估計都會係差唔多, 因為跑場點都係吃力啲...

跟住星期日及一都係跑場, 體力未完全回復, 覺得雙腿乏力, 唯有保持跑完8K就收工, 尾圈想發力衝圈都只係勉强做到, 有少少Over Training嘅感覺...

前排借咗阿輝隻Garmin Forerunner 405, 奧運歡樂跑第一次試用, 跟住試兩晚跑場及一晚荔枝角公園...

405可以記錄Lap Time及Total Time, 仲有實時步速及已跑距離, 一隻405就有哂跑步錶及GPS Data Recorder嘅功能...

錶面外殼個Bezel Ring, 操作好似iPod咁, 用手指輕觸式操控...
但有師兄指出跑步後, Bezel Ring可能會不能操作, 我自己試用後, 發覺問題又唔係咁嚴重, 可能我啲手汗唔係咁犀利...

除基本功能外, 405可以設定一個Virtual Partner, 實時比賽, 好似幾過癮...
另外可以設定不同嘅Training Modes, 針對唔同嘅訓練狀況, 不過暫時未玩到咁深入, 有機會再試...

至於GPS功能, 可人手輸入及儲存座標, 作引路指向...

三晚嘅測試, 左手腕帶405, 同一時間左臂帶Qstarz BT-Q1300, 減少誤差...

左邊係BT-1300, 右邊係405...













場內測試覺得BT-Q1300好少少, 右邊明顯分到Track 1及Track 6, 左邊受到觀衆臺阻擋衛星訊號, 明顯跳線...

至於荔枝角公園測試, 天空阻擋較少, 兩者得出嚟嘅結果相差無幾...

論到跑步實用性, 當然係405好好多 不過BT-Q1300可以作多方面用途, 各有各長處...

奧運歡樂跑係自己人生第一個跑步活動...
星期五打風, 星期六晚仲雷暴警告, 擔心活動會因此而取消...

好彩天公造美, 星期日起身時無落雨, 地面乾咗九成...
為求保險, 都要帶遮及著ASICS GEL-INFINI上場...

7:30am到達迪士尼站, 唔太早唔太遲...
行到去集合點, 人數未算太多, 立即攞號碼布及紀念品...
之後就入帳幕換衫, 但地面仲係好濕, 好彩一早著定跑褲, 只要除低運動長褲, 再換背心就搞掂...

跟住影咗幾張相, 之後Ban亦已準備妥當, 一齊行埋一角做拉筋...
拉完筋後仲有時間淨, 喺邊位行人路慢跑兩圈熱身...

開幕儀式後, 跑手開始湧至起步點...
我諗當時有三百人喺自己前面, 有老有嫩...

同Ban吹水期間, 不知不覺已經開始起步...
差唔多要行過起步線先至可以開始慢跑...

開頭1000米, 因為有較多小朋友及後生仔, 要經常左穿右插超越佢哋...
一直保持均速跑到上山路段, 開頭跑得唔快, 保留體力...

到上山路段, 前面一堆跑手開始放慢, 阻塞跑道, 被迫減慢緊貼其後...
我又唔覺跑得特別吃力, 所以一有機會立即發力插前超越, 如是者用此方法超越三四堆跑手...

Ban好輕鬆同自己並肩而上, 佢呼吸仲係好暢順, 自己開始有少少喘氣...
去到接近上山路段頂部, 已經見到領前跑手喺對面線跑回頭...

落山一段後就係一個U型急彎轉回頭上山路...
到上山路段一半, 我叫Ban唔好等我, 佢就發力一枝箭咁追上前面嘅跑手, 我亦加快速度, 超越幾位跑手...

過咗山頂位置到下岥段, 怕傷腳, 所以減慢少少, 好快就畀後面嘅跑手超越自己...

到轉入迪欣湖地段, 地面變成平坦嘅石磚路, 而且較多大彎...
心知差唔多剩下四份一路程, 再度發力加速...

去到尾段, 工作人員攞住大聲公嗌話剩番兩個彎, 但當時我又望唔到終點線喺邊, 唯有加速少少, 過多兩三位跑手...
點知真係轉多兩個彎, 終點線忽然出現, 覺得再發力已經太遲, 唯有保持速度衝終點, 望住攝影人員, 搏上鏡...

最後以22:20.31完成4.5Km, 平均步速4:59/Km...
比預期快咗少少, 但整個過程又唔覺得好辛苦...
以往喺運動場係做唔到呢個時間, 所以我覺得跑街真係快過跑場...
如果唔係開頭畀小朋友及上山頭段嘅跑手阻一阻, 應該可以快多幾秒...

Ban以21:1X完成, 十份一全馬, 對佢嚟講只係啱啱熱完身, Hea住咁跑...

過咗終點線, 要行9分鐘返回起點, 之後就影咗幾張相, 及攞最重要嘅迪士尼紀念品及証書...

天氣唔晒又唔熱, 跑得好舒服...
加上紀念品有奧運文貝或護腕, 及迪士尼自動縮骨遮, 真係好抵玩, 可惜30份抽獎禮物就冇我份...

當日借咗阿輝隻Garmin Forerunner 405試用...
GPS量度嘅軌跡相當理想, 由於路段環境空曠, 所以絕少跳軌...
而且跑步時可以知道實時步速及已跑距離, 對跑新賽道及即時調整策略好有幫助...

回想當日慢跑兩圈做熱身, 等啲筋踺開始進入狀態, 對之後正式跑步, 非常有幫助...
另外, 下坡路段較慢, 要練習多啲下坡, 調整下坡時嘅跑姿...

夏天即將來臨, 賽事進入淡季, 下一次參與嘅活動好大可能係11月嘅CyberRun for Rehabilitation 2009...

前排行過吉之島$10店, 搵到一樣幾好嘅用品 - 按摩球...

鋪一塊毛巾喺地面, 坐喺梳化, 腳踏按摩球, 一邊睇電視或用電腦, 一邊滾動按摩球...
按摩球上嘅凸點可以刺激腳底, 對足底筋膜炎有幫助...

至於對阿基里斯腱, 跑完之後都會用冰敷, 但一向都只係用硬梆梆嘅冰袋, 用喺腳踭唔係咁方便...
後來喺屈臣氏買咗3M Nexcare嘅冷熱敷墊, 雪凍咗之後都仲係軟身, 敷完腳踭之後仲可以敷埋脛骨及雙膝, 非常好用...
原來屈臣氏賣得幾貴, 之後喺尖沙咀龍城見到平幾十蚊, 不過有時啲嘢係趕住用, 買貴少少都無計...

近排開始跑街, 但好難估計跑咗幾多, 亦較難控制自己嘅步速...

原本打算買Nike+ iPod Sport Kit, 雖然無iPod Nano, 但買個iPod Nano 4代 8GB都唔算好貴...
後來諗清楚, 如果落雨天, 我係唔會帶住跑步, 咁當日就無數據可以上載Nike Server, 亦失去咗記錄跑步數據嘅意義...
而且一向都唔鐘意聽住歌跑步, 會畀音樂打亂自己嘅節奏...
都係等出年春季先至買Nike+第二代嘅SportBand, 咁就落雨都唔怕...

除咗Nike+外, 亦有考慮Garmin Forerunner 405手錶, 用GPS記錄跑步路線, 不過要二千幾...
價錢貴都係其次, 最大問題係好多用家話濕水後, 啲按鈕會㩒咗都無反應...

後來唔覺意搵到Qstarz BT-Q1300S GPS Recorder, 跟埋Armband, 不過係螢光橙色, 太Sharp, 唔想用...

呢個GPS Recorder, 用內置鋰電, 12小時操作時間, 所以幾輕巧...
用上MTK II晶片, 感應度達-165dBm及支援多達66ch衛星接收能力...
Sampling Rate仲可以用軟件修改, 切唔同嘅需要...

除咗可以記錄跑步路線, 仲可以加插標籤入相片檔, 遲啲去北海道時就非常有用...
另外, 亦可用藍芽連接Notebook及PDA, 作實時定位, 不過對我無乜用, 北海道租車已經內置GPS, 唔駛煩...

初次喺屋企樓下試用, 30秒內可以成功連接...
加上AGPS星曆下載, 連接等候時間可以再縮短...

喺荔枝角公園試驗, 原來一圈大約2.2Km, 跑三圈加來回屋企, 接近9Km...
但跑步路線有幾個V型急彎及上落斜, 非常影響平均速度, 相比跑場可以相差1Km/hr...

如果跑步途經高樓大廈或小巷, 紀錄就有可能有所偏差, 不過可以用電腦修正...
依家可以知道自己跑咗去邊, 都幾好玩...

跟機嘅軟件有兩套: Travel Recorder及QSports, 內置連接Google Map, 各種數據都可以輕易顯示...
如果要玩Google Earth, 須要下載Plug-in...

QSports可以幫助記錄跑步資料及預定目標, 仲可以編輯軌跡, 非常簡單易用...

五月尾星期六需要返公司OT, 之後去咗金鐘閒逛...
去到Gigasport, 慣例睇睇Mizuno跑鞋, 見到一款啱啱出嘅Mizuno Wave Aero 8, 整體上同Aero 7好相近, 既然係同一系列, 設計相似好正常...

一向都想買Aero 7, 因為開始覺得對Mizuno Rider 12重, 每提一步都要花費較大氣力, 但Aero 7 Wide部份鞋底係黃色, 覺得麻麻哋...
Aero系列係比賽及訓練專用設計, 全馬Sub4跑手適用...
全馬Sub4, 呢個程度對自己當然係遙不可及, 但擁有一對比賽及訓練用跑鞋, 亦可作為自己嘅訓練推動力, 只係擔心對鞋負荷唔到自己嘅體重...

後來有師兄買咗Aero 8 Wide, 評語唔錯...
我覺得Wide版顏色幾好, 專業得嚟又唔會太過簡單...

上星期六一早起身, 食完早餐就去跑荔枝角公園...
當日有太陽, 微風, 熱到想死, 體力消耗得好快...
堅持跑公園兩圈加運動場外圍一圈, 差唔多跑咗一個鐘...
其實今次專登想喺炎熱嘅氣温下跑, 等自己嘅身體可以適應唔同嘅天氣環境, 磨練自己嘅意志, 有太陽晒同無太陽晒, 感覺可以差好遠...

星期日去完旅行社, 再去波鞋街睇睇...
初試Aero 8正常版27號, 左右兩邊好貼腳, 覺得太窄, 唔係咁適服...
再試Wide版27號, 腳趾位適服好多, 但又唔會太鬆...
叫店員搵多對Wide版26.5號試試, 呢對直頭著唔到, 太過緊, 但我對Rider 12係正常版26.5號, 可見設計唔同, 適合嘅Size亦唔同...
最後決定買Wide版27號...

Aero系列嘅踭位同其他比賽及訓練鞋一樣, 都係比較修身, 而且為求減輕重量, 所以鞋底較薄...
如果跑姿不良或訓練不足, 我覺得會較易受傷...
尤其如果跑姿係腳踭觸地, 要更加小心, 因為鞋踭薄, 反震力亦較大...

之前都有考慮過Spacer及Idaten, 但呢兩款更加專業, 相信暫時唔適合自己...

返到屋企抖一陣, 立即跑去公園試鞋, 等唔切幫對鞋Run-in...
一開始跑, 路感好實在, 並覺得鞋底及踭位頗硬, 輕身程度同ASICS GEL-INFINI差唔多...
好在自己之前已將腳踭觸地轉為偏向中掌側觸地, 但需要少少時間習慣新鞋, 加倍注意落腳時嘅跑姿...
跑完公園兩圈, 再跑去運動場, 外圍一圈, 再加場內兩圈, 感受吓唔同地面嘅反應...

星期一跑場, 準備出發時開始落雨, 唯有著「落雨戰鞋」GEL-INFINI...
落到場, 越嚟越大雨, 唔理咁多, 照跑...
成個場, 除咗兩三個阿婆擔遮散步外, 得返自己一個喺雷暴警告下跑步...
跑完行返屋企, 由頭濕到落腳, 成個雨夜屠夫咁款...

星期三無落雨, 著Aero 8 Wide落場...
對鞋好食地, 頭幾個圈去得好快, 真係有啲人鞋合一嘅感覺...
跟住要減慢及控制步速, 避免體力消耗過快...
當晚天氣好悶熱, 無乜風, 出好多汗, 跑得幾辛苦...
跑完後連褲都濕哂, 同畀雨淋完無乜分別...
雖然跑得咁辛苦, 但平均圈速快自己紀錄2秒幾一圈, 都算值得...

昨晚好似想落雨, 都係著GEL-INFINI好啲...
由於覺得疲累, 所以打算跑慢2至5秒一圈...
最後用阿輝教嘅策略, 留前鬥後, 最尾兩圈狂衝, 結果打破自己嘅圈速紀錄...
雖然係狂衝, 但衝完後又唔覺得特別氣喘, 如果係幾個月前, 一定好辛苦...

經過呢兩晚之後, 腳筋痛又開始變得嚴重, 今晚要抖抖, 去Gym鍛鍊Hamstrings及Quadriceps, 明日如果天氣好先至再跑...

近排H1N1已經再無乜特別新聞, 據知日本新聞亦已無報導好耐, 日本覺得H1N1只係比流行性感冒嚴重少少嘅病菌, 既然唔死得人, 就唔需要特別處理...
我一向都覺得香港政府自維港Show後, 處理手法唔係咁好, 加咗好多政治考慮, 唔係一心為香港人好...

星期六决定到銀行中心旅行社買ANA藍天假期北海道自遊行機票加兩晚酒店Package...

首先去康X, 個位後生仔職員十問九唔識答, 好似一個暑期工...

跟住去縱X遊, o個位女職員就好好多, 起碼覺得佢有足夠知識及經驗...

再去東X遊, 又係一位後生女職員, 呢個仲醒目, 佢記得當日朝早日航天地出咗個新優惠價錢, 來回機時間差唔多, 一樣係零晨去, 零晨返, 酒店亦一樣, 仲可以揀高半級嘅酒店房, 不過酒店要連續住兩日, 唔可以任揀...

返屋企計過條數, 如果用日航天地個Package, 兩個人加埋可以慳到千六...

星期日一早再去東X遊, 搵返o個位女職員幫手...
因為以前未試過要自己轉機, 所以有好多問題, 呢位職員好有耐性解答, 仲提醒去程內陸機最好揀遲一班, 驚太趕上唔到機...
佢對酒店方面亦熟識, 我要求非吸煙樓層, 好快已經答到我預定層數係非吸煙...
最後幫手揀定機位, 唔駛煩...
可能自己少出外旅遊, 但遇到呢種有誠意及專業嘅服務態度, 已覺得非常滿意...

相機背包買咗, 新旅行喼亦已在上星期六送到, 只差一張8GB Compact Flash咭未買...
依家仲要諗諗上網租車或搵旅行社幫手...

上星期得知運動場將會在昨日開始維修, 全面封場20日...
一直都好想嘗試跑街, 今次迫住要搵路...

網上睇到師兄師姊久唔久會喺荔枝角公園集訓, 據聞一個大圈有2Km, 星期日中午時段去試路...

從Google Map約略量度, 從屋企樓下出發到公園入口約0.9Km, 不過要過兩個燈位, 好在車流量一向唔高, 9成機會可以衝紅燈跑過馬路...

入到公園內部, 感到好似入咗迷宮一樣, 好多分义路, 都唔知跑邊條路先啱...
唯有減慢步速, 一邊跑, 一邊搵路, 間唔中停低睇地圖...

一路跑到去差唔多到盈暉壹, 左轉繞泳池一圈, 沿路回頭, 不過泳池呢一段路人影都無隻, 夜晚跑就唔係咁好...
回頭之後見到有一段上山路, 衝上去之後下望見到X-Game場及網球場, 繼續向右沿木橋向前跑, 點知去到盡頭好似無路行, 唯有回頭搵路落X-Game場...
之後跑到網球場, 又係無路行, 回頭終於見到上山緩跑徑...

緩跑徑有兩段上落路段, 以前一向跑平地, 依家初試斜路, 可以訓練大腿肌肉及上落斜技巧...
跑到緩跑徑中間路段, 有一小段落斜三連急彎, 步速要減到好慢, 避勉傷腳...
過咗緩跑徑, 都唔知應該向邊面跑, 唯有隨意選路, 熟習環境...

跑過嘅路段, 地面有階磚、石屎、石板、木板, 亦有幾硬嘅緩跑徑...

最後跑到體力開始下降, 離開公園跑返屋企...
望一望錶, 原來跑咗成個鐘, 掛住搵路望風景, 唔覺唔覺跑咗咁耐...

星期一晚原本諗住跑場, 不過遲咗返屋企, 跑場好似好趕, 決定跑公園...

雖然已經係九點半鐘, 公園仲係人來人往, 不過都唔需要經常"Z"形穿插散步人士...
今次第二次跑公園, 無去到泳池o個邊, 主要都係跑網球場, X-Game場及緩跑徑...

跑到咁上下, 離開公園, 跑去運動場, 再入運動場跑咗一圈...
運動場跑道地面較軟, 明顯要加大力量...
據聞喺運動場久經訓練後, 跑街特別好力, 依家終於體會到, 所以跑公園對自己都係頗輕鬆...

跑場一圈後, 試跑運動場外圍街道一圈, 約0.95Km...
發覺四份三路面係石磚地, 鋪得唔係好平, 要跑得較小心, 避勉拗柴...
而且巴士廢氣較多, 唔係咁適合快跑, 下次要搵無咁大塵嘅街道試跑...

有一位營養師講過, 淨量度體重唔可以全面顯示身體是否過重, BMI只可以當係一個大約指標...
如果目標係減肥, 量度脂肪比例會比較合適...

由於自己骨架大及肌肉多, 自知好難減到150磅以下, 妨且減得太多未必係好事...
依家肌肉力量已經比以前差咗, 最明顯係玩飛膊, 咬實牙關做第四組都唔可以完成, 不過脂肪減咗, 肌肉線條靚咗好多...

前一排永安大減價, 有一款TANITA UM-71電子脂肪磅由六佰幾減到三佰幾...
據聞TANITA呢隻日本牌子幾好, 好多醫院及診所都有選用...
其實都搵咗電子脂肪磅一段日子, 不過見最簡單嘅款色都要四佰幾, 唔捨得買...

呢款UM-71電子脂肪磅有四組記憶, 仲可測試身體水份...
返到屋企立即試用, 脂肪比例約17%, 水份約60%, 對自己嘅年齡嚟講, 係屬於健康範圍內...
通常朝早起身後量度, 因為變數較少...

依家體重已經跌到差唔多160磅, 我諗過多一至兩個月, 就可以達到十年以來嘅最低點...
其實依家仲係有少少豬腩肉, 要加把勁消滅佢...

成個星期都係天氣不穩, 啲雨落吓又停吓...
星期日及一都係冒住微雨跑, 唔想整污糟對Mizuno Rider 12, 所以著ASICS GEL-INFINI, 依家對GEL-INFINI已經成為我嘅落雨專用鞋...

昨日端午節, 個場有運動會舉行, 封到下午六點...
終於等到夠鐘, 但已經開始落微雨, 唔理咁多照落場, 點知越落越大, 由頭濕到落腳, 對襪可以扭得出水...
Cool Down健走o個兩個Laps開始覺得寒, 係咁兒拉完筋就即刻返屋企冲熱水凉, 免得傷風感冒...

雖然落住大雨, 但覺得體力源源不絕, 第一個Lap已經比正常速度快...
之後有位印巴籍男仕追隨, 呢位跑手步頻密而且耐力長久, 一向佢都係跑得快過我...
既然狀態唔錯, 一於發力唔畀佢過頭, 大家保持一段距離, 追迫到打破自己記錄...
維持12個Laps左右, 腳筋開始有少少痛, 知道係時候收慢, 免得好似上次咁, 催谷過度引致加重傷患...
最後兩個Jogging Laps好舒服, 時間比以前快10秒有多, 真係不可思議...

返到屋企睇圈速記錄, 平均快7秒幾一圈, 自覺好理想, 最開心係腳筋今日唔會特別痛...
平均步速雖然係快咗, 但又唔覺呼吸不順, 温度低, 體力消耗亦減慢...

今個星期喺Gym開始鍛鍊Hamstrings, 加上之前鍛鍊Quadriceps, 可能大腿肌肉强化咗, 所以可以跑得輕鬆啲...

連續著咗幾次GEL-INFINI, 覺得越著越舒服, 又輕又吸震, 睇嚟今晚都係無咗佢唔得...

昨日得知阿輝亦會參加"奧運歡樂跑", 多個伴, 正!!!

阿輝仲報埋"荃灣黃昏賽10K", 我自問未夠班參加, 所以無陪佢玩...
估計呢類小型比賽, 本港高手雲集, 如果我参加都只會係跑最後面果批, 兼且腳傷未愈, 都係唔好勉强...

上星期四跑場, 腓腸肌仲係有少少痛, 返到屋企冰敷加按摩膏...

跟住六、日、一, 又係連跑三日...
星期六晚加星期日一朝早, 體力只係啱啱夠時間回復...

星期日唔記得帶錶, 數唔到自己跑咗幾多...
不過當日幾曬, 我9點鐘開始跑, 好快已經成身濕哂...
跟住見到邪神班師兄弟開始跑Warm Up Lap, 佢哋好快, 跑Track 8, 我前佢哋1/2 Lap, 2 Laps後已經畀佢哋過頭...
返到屋企睇新聞, 先至知道原來當日"必達夏日長跑", 有幾個跑手中暑入院...
其實我覺得當日唔係熱得咁誇張, 如果自知身體狀況而作出體力分配及速度調整, 應該無大問題, 後來據聞暈倒嘅人, 大部份係新進跑手及年青人, 呢一次係一個好好嘅學習機會及借鏡...
原本Ban都有叫我参加"必達夏日長跑", 不過當時啱啱有跟腱炎, 所以放棄参加...

星期一晚跑場, 天氣好悶熱, 跑完之後Cool Down, 拉筋時啲汗仲係滴出嚟...

昨晚打算跑場, 可惜七點幾鐘開始傾盆大雨...
原本落住雨跑都無乜所謂, 不過唔想整污糟對鞋, 唯有留喺屋企睇最後兩集Prison Break Season 4...
永別了, Michael Scofield...

上星期一臨時臨急被豬流感搞到要開OT, 無得落場跑, 迫住星期二要喺Gym跑Treadmill...
調校咗一個頗快嘅速度, 感受吓阿輝平時練10Km嘅情况, 最後只可以維持到5Km, 腳筋響起警號, 又係時候收工...
覺得跑Treadmill嘅感覺唔係咁好, 一來人多空氣差, 二來覺得路感好散好浮, 唔得實在, 如果無必要, 都唔想跑Treadmill...

隔一日落場, 保持正常步速, 跑完後腓腸肌有少少痛, 應該係之前跑Treadmill過快, 乳酸積聚...

跟住六、日、一連跑三日...
星期一覺得好疲累, 跑步時腓腸肌開始痛, 唔可以如常發力, 加上呼吸不順, 體力下降得好快, 唯有減慢步速及縮減路程, 避免因疲累而受傷...

其實為求減肥, 自己嘅正常步速應該係過快, 但好多時不知不覺, 會挑戰自己, 想打破最快圈速...
雖然已經減咗10磅, 但離目標155磅仲差11磅, 睇嚟要繼續保持一星期跑三至四次, 及減吃糖、油、鹽及肉...

Ban提議我参加"元朗區青年節長跑賽", 賽程8Km, 但由於腳傷, 唔敢勉强...

另外, 有個"奧運歡樂跑", 賽程約4.7Km, 不設計時, 路段係迪士尼週邊...
路程短, 可以輕輕鬆鬆慢慢跑, 可惜另一半因腳痛未能参加, 唯有同Ban兩個人報名参加...

好耐之前見到一個幾好用嘅相機背囊, Lowepro Fastpack系列, 側面有拉鍊, 只要除低一邊膊及拉開拉鍊, 就可以放相機入內, 非常方便...
自己已經有兩個相機背囊, 一個係Lowepro Orion Trekker, 另一個係Cullmann Ranger Comfort...
Orion Trekker較輕便, 機身連鏡頭可以直接放入, 但背部支撐較軟, 長時間用會較疲累; Ranger Comfort可以放長鏡頭, 而且背部透氣較佳, 但機身及鏡頭要拆開放入, 稍為不便...

上年去台北, 用咗一個長方型相機袋放機身及一枝Nikon Nikkor AF 35-105mm, 相機袋再放入Vaude Wizard Air 24+4背囊...
個Wizard Air好舒服, 長時間孭都無問題...
但返到香港後, 發覺枝陪咗我十幾年嘅Nikkor 35-105mm壞咗, 做唔到Auto Focus, 用Manual Focus都好勉强, 可能個相機袋太擠迫, 壓爛咗個Focus Ring...

後來買咗枝Nikon Nikkor AF-S VR 24-120mm f/3.5-5.6G IF-ED五毒鏡代替, 加埋枝Sigma AF 12-24mm F/4.5-5.6 EX DG ASP HSM, 去旅行夠哂用...

為咗九月尾嘅北海道之旅, 決定買個Lowpro Fastpack 200, 一方面可以保護枝新鏡, 另一方面使用亦較為方便...
最後喺Yahoo拍賣搵到一間鋪賣得好平, 第二日立即入手...

返到屋企試用, 都算幾舒服, 一機兩鏡, 仲可以放埋閃燈, 上隔容量亦頗大, 放地圖及旅遊書就最啱...

勞動節、佛誕加星期日三日假期, 趁天氣乾燥, 拎啲放咗喺衣櫃裏面嘅袋出嚟吹吓...
原來自己有好多相機用嘅袋, 鏡頭袋、閃燈袋加相機用袋, 都有十數個, 唔拎出嚟都唔知有咁多...

依家豬流感橫行時期, 未決定北海道之旅可唔可以成行, 唔怕病菌嚴重, 只怕日本唔畀入境...
其實已經上網Book咗一晚札榥Keio Plaza Hotel及一晚中富良野Furano La Terre酒店, 其餘兩晚打算用ANA Sky Holiday Package嘅酒店...

上星期六去咗旺角銀行中心, 啲旅行社水靜河飛, 可能都受豬流感影響, 個個都係睇定啲先至做決定...
依家只可以睇多啲旅遊書, 搜集多啲資料, 做定準備...
不過又係由於豬流感, 工作量增加, 返到屋企已經累到死, 睇書都睇唔入腦...

抖咗兩星期, Achilles Tendon仲係有啲痛, 但心癮難忍, 星期一晚落場健走加慢跑...

十分鐘熱身後, 健走Track 6五個圈, 等身體全面熱身, 之後開始慢跑...

腳筋位依然係唔多妥, 不過本住慢跑可以加速新陳代謝嘅心態, 繼續堅持...

慢跑五圈半後, 覺得已經差唔多, 避免加重傷患, 回復健走一圈半, 拉筋十分鐘後離場...

上星期喺Gym磅過, 重咗2磅半, 估唔到無跑一星期, 體重立即上升...
但今個星期二再磅, 反而輕咗3磅, 真係奇怪...

昨晚落場, 首先健走兩圈, 跟住慢跑八圈半, 等身體慢慢調節返以往嘅體能, 不能操之過急...

最近買咗兩本書, 一本係"即效伸展運動", 另一本係"健跑養成計劃書"...
兩本都係日本嘅著作, 翻譯成中文, 有相片亦有文字解釋, 值得一睇...

阿輝啱啱去完大阪, 搞到我都心思思想去番轉日本...
依家無跑步, 又無玩飛機, 喺屋企百般無聊, 最啱開始計畫去北海道...
原本打算出年去, 但今年工作忙, 唔出去抖抖真係頂唔順...

自己好鐘意駕駛, 但喺香港養車好唔實際, 所以打算去北海道玩自駕遊, 睇GPS加地圖, 應該唔會太難...
暫定五日四夜, 國慶前兩日出發, 避咗附加費...
路線主要係札幌、富良野及小樽...

九月尾十月頭時段, 開始入秋, 富良野應該無乜花, 但覺得去北海道而不到富良野, 好似無去過北海道一樣...
睇過其他旅遊人士之前喺十月頭影嘅相, 富良野都仲可以見到花田, 所以決定搏一搏...

網上資料好多, 睇都有排睇, 好在仲有五個月時間, 好以慢慢諗...

雖然九月尾唔算係旺季, 不過每晚酒店都要千五以上, 我覺得幾貴, 不過出得去玩就唔好計較咁多...
加埋機票、租車、膳食及洗費, 都要預每人萬五左右...
之後幾個月, 真係唔可以亂買嘢...

打算搵旅行社訂機票, 酒店及租車就直接上網Book, 呢個似乎係最經濟嘅做法, 但就要花時間搵資料及做Booking...
不過計畫旅行搵資料, 都不失為一種樂趣...

星期六去咗睇第二個醫生, 醫生話係跟腱炎, 開咗三日消炎藥...
最怕食消炎藥, 搞到個胃唔舒服足三日, 但唔食又唔得...

醫生亦吩咐盡量唔好行咁多, 及最好停跑一星期...
由於返工放工及工作需要, 好難避免步行, 不過就盡量避免行樓梯, 尤其係落樓梯, 好傷膝部...

自上星期二喺Gym跑20分鐘Treadmill, 已經停咗一星期有多...
依家覺得比上星期好咗, 但都係進展緩慢, Keep住一日搽三次「服他靈」...

非常掛念跑場嘅日子...

前兩晚開始每晚冰敷15分鐘, 有少量幫助...
不過今朝睇書話冰敷應該係受傷初期治療用, 復原期應該用熱敷, 今晚就試吓熱敷...

復活節假期第一日去咗濕地公園, 十點半到達, 唔算多人...

見到有綠海龜, 細細隻, 好鬼Cutie...
中間池塘有好多荷花, 橙、紫及粉紅色都有, 仲靚過香港公園o個啲...
可惜當日怕重, 無帶Nikon D70, 得部爛鬼BenQ DC C1060, 影相影得好求其...

濕地公園都幾好行, 啱一家大細, 不過無乜地方遮陰, 夏天就唔好去...
行咗三個幾鐘, 估唔到可以行到咁耐...
走o個陣時就好多人, 如果有心去都係早到達好啲...

第二日假期就留喺屋企休息, 食完Tea, 抖一陣, 落場跑...
前一日去完濕地公園及元朗, 對腳都幾疲累, 諗住以平常速度跑就算...
一開步跟住個後生仔, 保持距離, 佢跑Track 3-5, 我慣例Track 6...
由佢帶住跑, 跟咗8圈, 估唔到每圈可以平均快10秒...
可惜8圈後開始呼吸不順及腹痛, 放棄追逐, 回復平常速度...

第三日, 去咗葵芳行街, 左腳腳筋(阿基里斯腱)越行越痛, 心知昨日追後生仔時操勞過度...
返到屋企抖咗陣, 六點鐘落場跑...
頭兩圈跑得好辛苦, 腳筋痛到想放棄...
夾硬忍痛支持多一圈, 腳筋開始鬆, 無咁痛...
遇見一個Uncle跑Track 1, 照跟...
Track 1及Track 6一圈相差約40m, 所以每當到彎位時, Uncle就會拋離我, 一到直路, 我就發力追返上去, 咁樣都幾好玩...
跟咗5圈, Uncle開始減慢Cool Down, 我都減到正常步速...
由於知道有腳傷, 唔敢跑得太多, 30分鐘後開始Cool Down...
睇番手錶記錄圈速, 原來有兩圈跑得頗快, 其中一圈仲破咗自己記錄, 估唔到隻腳跟痛到咁都可以有咁嘅成績, 多謝Uncle嘅帶領...

星期二喺Gym跑Treadmill, 唔敢多跑, 20分鐘3.5Km就收工...

前兩日買咗枝「服他靈」, 可以治療創傷後引致嘅痛楚及發炎, 對左腳嘅"阿基里斯腱"發炎(Achilles Tendonitis)應該有幫助...
不過依家行路都會痛, 明日都係睇吓醫生好啲, 跟住個星期, 要放棄跑步, 充份休息...

上星期二用Treadmill跑30分鐘, 唔知點解會搞到右膝痛, 喺地鐵企都痛, 返到屋企搽咗兩日冬青膏...

阿輝畀咗一隻佢有份設計嘅手錶我, 用手指就可以量度心跳率, 唔需要用手跳帶, 仲可以做步行器, 量度每日行咗幾多步...
用於跑步上, 踏步數量可以用嚟計算步頻及步幅, 例如1Km需要1000步...
另外, 隻錶仲可以顯示速度及跑步距離, 不過輸入嘅步幅要準確及步頻要穩定, 顯示嘅速度及跑步距離先至會準確...

星期五右膝痛已經好咗八成, 落場跑...
開頭左腳腳踭慣例會痛, 試吓用New Balance教嘅腳板側擊地方法, 跑咗半圈後, 又真係開始無咁痛, 可能受力點由腳踭轉移到腿部其他部份...
集中精神將跑姿改變, 當晚跑完後, 腳踭及膝部都唔覺得特別唔妥...

星期六清明, 竟然有少少太陽...
下午再落場跑, 繼續用腳板側擊地方法, 但跑咗20分鐘左右, 大腿四頭肌開始覺得疲累, 最後捱到30分鐘就覺得需要停止, 避免受傷...
睇嚟腳板側擊地, 受力嘅地方係四頭肌, 要喺Gym練習强化四頭肌...

經過兩次嘅測試, 原來自己嘅步頻真係偏慢(約920/Km), 步幅亦唔算大(1.07-1.10m), 所以慢步頻加細步幅, 即係跑得好慢...

昨晚再用Treadmill跑30分鐘, 步頻及步幅相比跑場都係差唔多, 不過就跑得舒服好多, 唔會覺得唔夠氣, 所以跑場真係需要更多體力...

上星期四睇醫生, 醫生話我左腳腳筋發炎, 即時打咗枝針, 再加三日藥及揸藥膏...
休息咗幾日, 情况都係差唔多, 唔覺明顯改善...

停跑咗一星期, 心癮難忍, 昨晚忍唔住落場...

拉完筋後, 先健走兩個圈, 即係快速步行, 約5.9km/hr...
昨晚帶咗心跳帶, 原來健走時心跳率110都未到, 去唔到帶氧運動階段, 就算健走一個鐘, 對消脂幫助不大...

腳筋唔覺得痛, 開始慢跑, 但係兩個半圈後, 腳筋又開始痛, 唯有停跑, 回復健走...

健走圈半後, 痛感減去, 又開始慢跑...

自己跑姿一向偏於低頻步幅大, 嘗試調高少少步頻及減低步幅...
試咗兩圈, 腳踭負擔好似輕咗, 但覺得節奏有啲亂, 而且呼吸變得較急促...
由於自己係跑步新丁, 一直都搵緊一個啱自己嘅Form...

全面熱身後, 已經再無痛楚, 可以回復之前嘅速度, 心跳率大約165...
雖然可以回復速度, 不過都唔敢太搏, 驚搞到腳筋進一步惡化, 所以一到40分鐘就開始健走Cool Down...

用ASICS GEL-INFINI落場跑咗三次, 除咗每次著上後開頭幾分鐘有少少唔慣, 無其他投訴...

鞋底始終係偏厚, 路感同Mizuno Wave Rider 12差不多, Mizuno Wave Precision 9較好...

為求健康及減肥, 盡量少吃油、鹽及甜, 肉類都少吃...
但出街食飯好難避免肉、油及鹽, 所以幾星期前開始, 星期一至五嘅午餐, 食大半碗高纖穀類食品, 完全無油無肉, 並可減膽固醇...
喺百佳International買, $4X有一千克, 可以食到超過一星期...
一包裡面有小麥、大麥、燕麥及裸麥, 亦有五種生果 (提子乾、香蕉片、蘋果乾、杏仁及草莓)...
加熱水浸10分鐘就可以食, 少少甜, 經濟、簡單又健康...

最近三個星期, 每個星期跑三晚, 每晚7至7.5Km, 全程45分鐘左右, 視乎當日狀態而定...

根據資料: "過重人士於6至12個月內減去現時體重的5-10%屬安全及可行的體重控制目標"...
跑咗一個多月, 到依家已經大約減咗5磅, 如果可以保持呢個進度, 希望半年就可達到目標...
不過要堅持午餐食穀類食品、少吃肉及甜, 配合45分鐘以上帶氧運動, 先可以慢慢減磅...

但食穀類食品嘅壞處, 就係做Gym時力量唔夠...
好似玩飛膊, 一向做開80磅, 但依家一到第四組, 已經覺得體力急速下降...

另外, 亦開始食葡萄糖胺, 500mg一粒, 每日二至三粒...
葡萄糖胺係關節軟骨元素, 能刺激製造軟骨和關節潤滑液, 研究話可以保護骨骼, 強化關節, 幫助修復關節軟骨...
暫時食咗兩個多星期, 要連續食四個星期先開始見到成效...

買葡萄糖胺時, 送魚油丸, 每日一粒, 不過有啲擔心會越食越肥...

隻左腳腳踭位腳筋痛, 就算做足Warm Up, 頭兩三個圈都會痛, 要就住跑...
有時跑跑吓就唔痛, 有時就仲有少少痛...

星期一跑完後, 決定休息四日, 等新傷舊患可以有時間復完, 星期六復操慢跑...
今晚都要搵醫生傾吓偈, 睇睇隻左腳腳筋...

跑步其實有好多方法, 喺我呢個初學者眼中, 最基本分為腳尖、中掌及腳踭擊地...

由於自己年紀已經唔輕, 過哂好勝嘅階段...
師兄華哥有一段講得好啱 :
"長跑是強身健體，最重要唔好令到自己受傷。
所以學跑步時，首先要學識避免受傷。"

為避免受傷, 華哥建議用腳踭擊地, 雖然會比中掌擊地慢少少, 但腳踭擊地可以減少反擊力伸延到小腿及膝部...
自己一向都係用腳踭擊地, 所以唔需要特別改Form, 反而手臂動作要改改...

由於跑姿係腳踭擊地, 跑鞋一定要有良好嘅腳踭緩震功能...
Mizuno Wave Rider 12緩震效能良好, 可惜偏重, 我對26.5重300g...

華哥介紹ASICS GEL-INFINI, 中國製造, 價錢唔貴, 實而不華, 最重要係緩震功效唔錯...

星期三晚去咗波鞋街試試...
感覺上, ASICS GEL-INFINI明顯同Mizuno Wave Precision 9及Rider 12唔同...
前掌鞋底較薄, 感覺幾貼地...
後踭舒適, 大力踏踭時, 鞋踭底部明顯被壓, 緩震力應該唔錯...
今次試27號, 鞋頭部份較貼腳, 但又唔會太緊迫...
但以整體鞋底來說, 感覺上較單薄, 無Mizuno咁實在...
考慮咗一陣, 決定買嚟試試...

返到屋企研究, 原來單薄嘅感覺來自塊較薄嘅鞋墊, 可能鞋底緩震做得足夠, 鞋墊亦唔需要太厚...
對鞋幾輕, 27號重240g, 以一對非比賽而且厚底鞋嚟講, 真係算好輕...
至於手工, 同Mizuno差唔多, 不過論多型, 當然比Mizuno輸成條街...
記得喺鞋鋪試鞋時, 連鏡都無照過, 因為根本無諗過會用嚟平常出街用...

昨日著住返工, Run-in對鞋, 開頭有少少唔慣...
到下午時間, 開始覺得幾舒服...

晚飯前落場跑Track 6, 感覺幾好, 鞋身比Rider 12軟, 緩震力足夠, 膝部唔覺得痛...
至於對鞋嘅耐用程度, 要跑多幾次先至知...

華哥話用呢款鞋跑全馬, 跑完都唔覺得腳痛...
Ban問我對鞋係咪較貼地, 我暫時未感覺到, 明日再落場感受吓...

之前跑步為求保持帶氧運動階段, 刻意減慢跑速及將時間延長, 將心率降低...
用呢個方法跑咗幾次之後, 問題開始出現...

在開始跑頭幾個圈, 感到左腳脛骨痛, 全面熱身後就會唔痛...
網上資料提到初學者患脛骨痛症較為常見, 因為短時間內加重訓諫距離...
有位師兄講個人經歷, 忍痛照跑, 最後雙腿脛骨多處爆裂, 醫生都嚇咗一跳...
所以依家比之前跑得更慢及更短時間, 遁序漸進, 等身體慢慢適應後, 再加快及加長, 之前實在太心急...

另外, 左膝有舊傷, 以前打網球要帶護膝套...
仲好記得當年喺海洋買護膝套時, 店員問我係咪扮Michael Jordan, 畀佢激死...

自上星期三落場跑完後, 星期四再喺Gym跑, 但跑到半個鐘, 左膝已經開始痛, 唯有暫停...
星期六日唔敢再跑, 需要充份休息...

休息到星期一, 落場跑, 再減跑速及時間, 感覺唔錯, 只有少量肌肉疲累...

由於左膝痛, 買咗LP納米竹炭保健型護膝套, 再買多條LP護膝帶畀右腳用...
星期三試用後, 兩邊膝真係無乜痛, 仲可以比星期一跑快多一圈...

遲啲腿部肌肉强化之後, 左膝會試吓轉用護膝帶, 因為護膝套唔多唔少都會令到血液運行不順...

過去一年, 經常被足底筋膜炎折磨, 時好時壞...
農曆新年前, 經常周圍去, 行得多, 足底筋膜炎再次變得嚴重...

為求減輕病情, 每晚都要拉小腿及碌網球...
依家加上跑步, 順手拉埋大腿及做足踝訓練...

由於對Nike Shox Experience+唔啱自己用嚟跑步, 所以改用嚟返工...
但係個鞋底幾硬, 好多時都會搞到腳踭或腳底痛...

有師兄介紹買HEMAX鞋墊, 但質量好似麻麻哋...
亦有師兄話用New Balance鞋墊, 有好多唔同種類...

前幾晚去到時代嘅New Balance Store, 最後揀咗Performance Sport Cushion Insole, 前掌及後踭都有ABZORB做吸震, 足弓位有額外承托, 腳踭底部有碳纖架固定, 放落Shox試完之後覺得唔錯...

返到屋企, 再放落Shox, 問題出現, 原來Shox個踭位較窄, 鞋墊踭位個碳纖架頂住, 鞋墊唔可以完全放入...
Mizuno Precision 9就無呢個問題, 同鞋墊好夾, 對鞋墊唯有留番畀Precision 9作跑步用...

既然Shox嘅設計咁奇怪, 索性用爽健鞋墊...
第二日收工, 買咗爽健吸震鞋墊, 到依家用咗幾日, 效果都唔錯, 腳踭位無之前咁痛...

依家跑步主要為減磅...

為求燃燒脂肪, 以自己嘅年紀, 心跳率要保持每分鐘111至148之間, 連續跑45分鐘以上先至有效...
如果心跳過快, 身體會進入無氧運動狀況, 令肌肉產生乳酸及令肌肉疲憊, 身體要休息幾日等乳酸代謝掉, 所以過量的運動會影響效率...

上星期喺Gym開始改變跑步習慣, 用較慢步速跑45分鐘, 減低心跳率, 距離多少無所謂...
星期六落場跑用同一策略, 發覺雖然係步速慢, 但由於時間長, 其實比以前跑得仲遠咗...

為求量度心跳率, 買咗隻Ciclo Sport CP 12C測心跳跑步手錶連心跳帶...
心跳帶唔需要紥得太緊, 基本上唔影響呼吸...
喺屋企試用, 靜止時心跳率55左右, 用把脈方法量度比較, 相差無幾...

星期六落場試用, 左手手錶計算圈速, 右手手錶量度心跳率...
保持慢跑速度(2'30" 400m), 心跳率平均172左右...
有師兄提過, 啱啱開始練跑, 17X算係正常, 可以接受, 練習多咗, 强化心臟功能後, 心跳率自然會下落...

據聞條心跳帶可以配合跑步機, 未有機會試...
不過喺Gym跑步用心跳帶, 好似好異相...

星期五同另一半去咗兩間喺灣仔嘅跑步專門店睇跑鞋, 但佢都係睇唔啱...
再落銅鑼灣世貿嘅運動家睇吓半專業版嘅Asics Tiger, 都係無心水, 我自己反而買咗一件跑步背心及一件諗住用嚟做Gym用嘅籃球背心, 減到差唔六折, 非常抵買...

跟住再去Sogo睇Mizuno, 但無折, 立即徹退...

去時代途中經過允記, 入去望望, 做o緊8折...
經我極力遊說, 終於肯試Rider 12 Women及Precision 9 Women...
試完兩對後, 最後揀Precision 9 Women, 經過兩星期不停四處揀鞋, 終於了咗件心事...

我見做o緊8折, 打算買Rider 12, 問店員有冇US9(27)號, 可惜店員Check完後話全港各店都無, 好失望...

再去時代, 見到Royal Sporting House做o緊Crazy Sale, 入去八八...
買咗一件Jacket及一條褲, 價錢又係好抵好抵...

由於買唔到Rider 12, 心有不甘, 星期日去荃灣中興...
靠撻朵獲得折頭, 試US9(27), 有少少鬆, 再試US8.5(26.5), 左腳較貼, 原來我左腳係較右腳大少少...
記得阿輝講過, 如果唔係用嚟返工, 買貼腳Size會好啲, 咁就決定買26.5...

當日仲喺Marathon買咗條做Gym長褲, 又係大減價, 唔買都對唔住自己...

短短幾個星期, 買咗5對鞋及大量運動用品, 又係時候開始要慳啲洗...

上星期四瞓厲頸, 放工照去做Gym及跑步, 第二朝條頸及左邊膊頭仲係痛, 買枝安美露搽, 無乜大作用...

星期六朝瞓到七點鐘, 痛到醒, 搽安美露, 再瞓過...
下午瞓完晏覺, 食個Tea, 抖一陣, 落場跑...
雖然頸及膊頭痛, 但又唔影響跑步, 只係擰唔到去左邊...

到星期一, 仲係痛, 唯有去睇醫生...
醫生話係肌肉發炎, 要食消炎藥, 但副作用就係胃痛, 搞到返工都好唔舒服...

昨日起身時, 痛得更厲害, 頭垂唔低, 頭左右兩邊擰又痛, 隻左手洗面都無力, 變咗個機械人...
到下午, 可能已經食咗幾次藥, 無咁痛, 可以開始左右擰...

今日好咗8成, 仲有少少痛, 起碼唔洗再做機械人...

咁小事, 都搞到痛咗幾日, 真係年紀大, 機器壞...

原本打算星期六去測試Ultima, 但係近排工作好忙, 幾個Projects喺身, 非常疲累, 估計都要繼續忙半年...
加上天氣潮濕, 又灰暗暗, 無哂意欲去飛, 寧願瞓多啲, 留番精力喺星期日落場跑步...

星期日瞓到夠先至起身, 食個早餐, 睇一集Download咗一日嘅Lost Season 5, 到1點鐘先至出發去運動場...

可能係食飯時間, 運動場得小貓兩三隻...

第一次落場跑, 唔係好習慣...
無咗跑步機嘅定速輔助, 唔係好知自己嘅跑速, 唯有遠遠跟住一個師兄, 佢快我又快, 佢慢我又跟住慢...

平時喺Gym跑, 室內冷氣環境, 比較舒服...
跑場就唔同, 當日濕度高, 好快已經成身汗...

星期一專登去觀塘, 買Casio W-752跑步錶, 得番最後一隻黃色...
阿輝原本已經有一隻黃色, 再托我買多隻紅色, 又係最後一隻, 我諗佢用嚟襯佢o個對紅色嘅Mizuno Wave LSD...

隻錶可以記錄60 Laps嘅時間, 咁就可以定下目標圈速...

另外, 有一個定速功能, 可以Set每分鐘提示聲响嘅次數, 幫助穩定步速...
昨晚喺Gym計過, 無論快跑或慢跑, 平均都係160步左右, 速度主要決定在步幅大或小, 所以隻錶嘅定速功, 對我呢個初哥嚟講暫時無乜大作用...

如果可以量度到步幅, 輸入隻錶, 就可以計算累績跑步距離, 呢個當然只係約數, 作用不大...

經過昨晚測試, 400m跑2'30"好舒服, 2'00"就幾辛苦, 所以暫時會从2'15"為目標圈速, 星期六或星期日落場試試...

近排經常去各大百貨公司及跑步專門店, 睇跑步用品及鞋...
見到啲Mizuno跑鞋, 大部份都好靚...
好想買多對Wave Rider 12, 應該會好舒服, 用嚟返工都唔錯...

上星期六, 晨早去咗啟德玩GeeBee EPP BX...

GeeBee EPP BX裝備:
- Dualsky XM2826CA-15
- APC 10x3.8SF
- EMAX ESC-18A
- Futaba 146iP Rx
- Futaba S3110 Servo x 3
- Waypoint W-060BB x 1
- Dualsky 11.1V 850mAh 25C, Zeta-Plus 11.1V 1000mAh 20-25C

當日風勢稍强, 基本上都係遊機河...

有一下高空Spin落嚟, 啲風吹到想救都救唔到, 到臨着地一刻, 夾硬拉Elevator, 希望可以放平機身, 最後都係刷花右邊主翼及摩打槳夾, 已經係不幸中之大幸...

風勢不減, 飛完6個Flights後離場...

喺兩個星期前嘅星期日晚上, 準備玩NBA 2K9...
開Amplifier, 中置喇叭發出好大聲嘅噪音, Amp嘅版面顯示"PROTECT"...
重新再開Amp, 結果都係一樣...
由於已經係11點幾, 所以無再繼續試...

第二晚, 拆開Amp個殼, 睇吓有無嘢燒咗, 但又搵唔到...
風扇又識行, 所以應該唔係過熱, 最後決定放棄...

呢組5.1 Amp已經用咗6年, 都係時候換有HDMI In/Out嘅Amp...

由於個LCD電視係Sony, 所以打算買返Sony Amp, 因為可以用到BRAVIA Sync...

自己唔係一個音響發燒友, 唔識分辨音質好與壞, 套5.1只要有聲出, 基本上已經可以接受, 所以搵套入門級數已經可以...

上網找資料搵到套Sony 5.1 Channel Home Theatre System HT-SS2300, 喇叭輸出功率比舊o個套更大, 而且有3個HDMI In及1個HDMI Out, 可以做Linear PCM, DTS及Dolby Digital解碼...
接駁Playstation 3, 高清機頂盒及DVD Player後, 仲有HDMI In剩, 可以留畀將來嘅Blu-ray Disc Player...

上星期去旺角睇睇, 中原嘅價格OK, 三千大元有找, 立即落單, 星期六送貨...

個盒比想像中細, 內裏Pack得好整齊...

由於個Subwoofer比舊o個個高, 要再搵位擺放, 索性重新執過哂啲位, 機頂盒及DVD錄影機移入電視架內...
另外, 兩隻Surround喇叭都要再拉過啲線, 足足搞咗一晚...

PS3用HDMI入Amp, 再經HDMI出電視...
BD嘅DTS-HD Master Audio及Dolby TrueHD高清音效可以由PS3解碼, 經HDMI輸出Linear PCM 5.1到Amp, 遲啲搵套有DTS-HD或Dobly TrueHD嘅BD睇吓, 試吓實力...
如果PS3可以出到高清音效Bitstream, 而Amp又有硬體解碼出7.1, 咁就完美, 不過屋企細, 擺放唔到咁多喇叭...
至於睇DVD, PS3經HDMI輸出Bitstream, Amp就可以硬體解碼DTS及Dolby Digital...

因為習慣睇電視節目唔用Amp, 所以高清機頂盒輸出聲畫經HDMI直入電視...
另外, 機頂盒輸出聲音亦可以經光纖入Amp作Stereo或5.1聲道輸出...

PS3及Amp可以支援x.y.Colour, 可惜個電視唔得...
不過如果唔係兩個電視拍埋一齊比較, 我諗我睇唔到x.y.Colour比RGB優勝嘅地方...

套Amp有Digital Cinema Auto Calibration– Silver Grade (DCAC), 接駁跟機嘅Microphone, 自動偵測5隻喇叭及Subwoofer嘅距離及調校級數, 30秒內可以完成, 呢個方法比以前人手操作更快捷方便...
除咗Subwoofer外, 其餘5隻喇叭嘅測量距離非常準確...

至於個BRAVIA Sync, 當轉電視嘅輸入頻道時, Amp亦會自動轉到相對應嘅頻道...
如果有其他BRAVIA Sync嘅器材如Handycam及BD Player, BRAVIA Sync會發揮得更好...

初步試用BRAVIA Sync, 覺得操作上有少少怪...
理論上當電視關上時, Amp亦會自動關上, 但我仲未試到, 要多少少時間再試試...

另外, BRAVIA Sync有一個Theatre Mode...
當用高清機頂盒及用電視喇叭出聲時, 啟動Theatre Mode, Amp會自動開啟, 聲音輸出會轉至Amp...
關閉Theatre Mode, Amp變成Muting, 聲音輸出轉返到電視...
不過, 當用Theatre Mode, 畫面嘅顏色偏暗, 而且色温怪怪, 據聞係特別營造戲院氣氛, 可能要關上所有燈光, 效果先至較好...

屋企細, 稍為較大聲少少, 個Subwoofer已經好强勁, 震到人都散, 好驚畀隔離屋投訴...
另外, 個Subwoofer唔需要接電源, 只係接Signal線, 即係Amp推埋隻Subwoofer, 好似好大負擔...

依家BD仲未流行, 屋企附近無店鋪有BD試睇, 暫時又無好戲值得收藏, 得閒要去HMV搵搵啲舊作...

右腳仲係久唔久會痛, 新年前專登揀對腳踭保護較好嘅跑鞋 - Nike Shox Experience+...

阿輝參加今年渣打半馬拉松, 有一個同事玩全馬, 連差唔多六十歲既舅父都跑10公里...

最近體重升到新高峰, 阿輝同我一樣咁高, 但輕過我30磅...
唔可以畀自己超過180磅, 依家都係時候迫自己減, 目標係160磅...

差唔多大半年無跑步, 上星期重新開始, 順便測試對新跑鞋...
覺得身體實在太重, 腿部肌肉未能適應, 跑得幾辛苦...

畀阿輝試試對鞋, 佢覺得腳踭位較窄, 容易受傷...
我都覺對鞋頗重, 雖然有Air Max, Shox吸震系統及Zoom Air, 但吸震力都只係一般, 較適合返工及做Gym...

前幾日, 阿輝建議我買Mizuno Wave Precision 9...
去到花園街, 水靜河飛, 可以慢慢搵...

見到允記有, 不過已經無哂貨, 心諗啱啱過年及將近渣打馬拉松盛事, 無貨都好正常...
阿輝教我去上樓跑步專門店搵, 但搵唔到間鋪喺邊...
死唔份氣, 再繼續搵, 最後喺大中搵到我嘅Size...

試跑後感覺良好, 比Nike Shox Experience+輕巧, 足弓位有承托, 腳踭吸震力好, 跑完之後, 腳底都唔會太痛...

屋企附近係運動場, 去跑步都好方便...
除喺Gym跑之外, 以後假期都要早啲起身, 食完早餐抖一陣, 再去練跑...
至於玩飛機, 應該會再減少次數, 都係做運動緊要啲...

Ultima EPP SOV終於改裝完成...

Elevator改用Pull-Pull系統, 比以前穩陣咗好多, 房仔嘅設計非常好...
左右各加一枝碳纖棒, 連接中間嘅碳纖棒, 再加玻纖布補强, 減低左右兩邊嘅扭動...

至於Rudder, Control Horn直接連接補强碳纖棒, 反應比以前靈敏及準確...

改完之後, 重量都應該增加咗唔少, 不過仲未量度機重, 未有確實數據...

近排好似經常都吹强風, 要等等先至可以試機...

過農歴新年前買咗隻已經出咗幾個月嘅PS3 Game - NBA 2K9...

當年Michael Jordan未退休時, 每星期都會追亞視嘅NBA地帶...

以前都有玩開NBA Live 95, 96等, 不過係PC版, 其他玩家會自製Michael Jordan...

自從Jordan退休後, 再無乜睇過NBA...
數吓手指, 原來Jordan已經退咗休10年有多, 時間真係過得好快...

喺自己心目中, Jordan係一個神, 無人可以代替到佢嘅地位, 直頭可以放佢張相喺屋企參拜...
依家仲有Keep住佢嘅比賽VCD, 剪報, 雜誌及相冊...

依家玩返NBA Game, 參照網友發報嘅Jordan及其隊友頭像及身型參數, 重現96-98年公牛隊...

喺NBA 2K9, Jordan嘅動作如Slam Dunk及Fade Away做得好似, 其他小動作都好傳神...
不過, 要控制得好, 喺唔同環境及時間按唔同組合嘅鍵, 都要花時間學習及練習, 比Top Spin 3複習好多...

一直以來, 對足球不感興趣, 就算係世界杯時段, 都只係貪得意睇一兩場...

對於球類運動, 鍾情於公牛年代嘅NBA及阿卡斯年代嘅網球...

中六及中七時, 係打籃球高峰期, 每日放學都打到學校關門為止...

記得讀緊大學時, 搵私人教練學網球, 學咗半年, 之後由於某啲原因而無再繼續...
其實一直都好想再打網球, 屋企有接近十塊網球拍, 對網球鞋都仲放喺屋企...
但一個實力相當嘅對手唔易搵, 如果相差太遠, 會好無癮...

經過差唔多一個月嘅努力, 每晚加白倉貴氏鈣水或TBS鈣水, ADA缸終於升到GH5, 舊缸仲犀利, 升到GH6...
暫時停止再加鈣水, 睇吓啲蝦嘅表現先至再算...

星期一晚返到屋企, 見到ADA缸啲公蝦周圍暴走(飛蝦), 心知將有母蝦抱蛋...
一直以為成個缸只得三隻公蝦, 但見到起碼四至五隻喺喥飛, 所以懷疑賣主都分唔到公或母...

虎牙母蝦抱蛋三星期, 前晚見到一隻BB蝦, 其他可能隱藏喺木底或石底...

今朝返工前望一望, ADA缸又再次飛蝦, 今次唔知邊隻母蝦有喜...

自從佛羅里達藍螯蝦歸西後, 已經有兩個空置鯛缸...
過多幾個月, 喺夏天來臨前, 可以Set多個12"方缸...
打算用瀘筒加水冷, 用嚟專門養白軀...

上星期雖然天氣好, 不過無意慾去飛, 所以繼續停飛一星期...
今個星期六會轉冷, 要等到過完年先至會再飛...

Ultima EPP SOV嘅Elevator及Rudder都仲未搞掂, 好懶, 唔想整...

Rudder加咗兩枝1mm扁平碳纖棒, 左右各一, 補强EPP...
Control Horn改用雷記產品, 收鏍絲夾實兩枝碳纖棒...
由於Servo改用Futaba S3156, 用上較長嘅Servo Horn, Control Horn亦可以用較外嘅窿位, 調較EPA到120%, 效果理想...
改完之後, 比以前穩固咗好多, 唔會畀風吹到搖吓搖吓...

既然時間充欲, 昨晚參照房仔嘅做法, 開始改Elevator做Pull-Pull, 暫時只係黐咗兩隻雷記Control Horns落Elevator...

原裝推桿係用兩條鋼綫組成, 少少偏軟...
一不做, 二不休, 索性改用碳纖棒...

另外, 覺得Stablizer有少少軟, 如果屋企有材料, 會考慮加碳纖棒連接Stablizer兩邊去機身...

天氣寒冷, 停飛一星期...
留喺屋企大掃除, 玩足兩日, 仲辛苦過返工...

掛住睇24, 冇乜時間改良架Ultima EPP SOV...
原來美國已經播緊Day 7, 仲去到第4集, 追唔到...

Ultima EPP SOV嘅Elevator已經整好, 昨晚開始整Rudder...
今個星期未決定去唔去飛, 可以慢慢搞...

運咗架Zeque EPP F3A返屋企...
主翼結構同SOV好相近, 有長碳纖棒橫跨, 印象中Primus EPP Z及GeeBee EPP BX係無長碳纖棒...
機身無乜特別, 一貫Hokusei作風, 用碳纖棒補强...
Elevator及Rudder係三文治式, Aileron就類似SOV嘅Aileron...
機身EPP用料比Primus及GeeBee厚...
手工比SOV好好多, 暫時未見到有地方需要自己執...
說明書建議Aileron, Eleavtor及Rudder包膠, 進一步補强, 好明顯呢架係一架快速機種...

其本上, 我覺得SOV係參照Zeque開發出嚟, Zeque體積較細, 相對上會較紮實...
但由於用料厚及多處補强, 飛行重量應該唔輕, 不過玩F3A, Wing Load大少少都唔怕...

依家三架Hokusei EPP機喺屋企, 極度阻地方, 呢架Zeque都唔知幾時先至有機會整嚟玩...

連續飛咗幾個月EPP機, 覺得有啲悶, 星期六晚搵返架Edge 540T 10e出嚟, 稍為測試一下, 準備星期日飛...

Edge 540T裝備:
- Hyperion HP-Z3007-26
- APC 9x4.5E
- Otter BS40A LED Version
- Futaba R617FS
- Futaba S3110 Servo x 3
- Waypoint W-092MB Servo x 1
- Hyperion LVX1500-3S 1500mAh 20-30C, Zeta-Plus 11.1V 1300mAh 15-20C
- 飛行重量 692g

第一個Flight開始, 覺得架機飛得好快又飛得好遠, 有啲唔習慣, 心諗Landing都唔知點搞...
油門控制相比EPP機有少少唔同, 應該係Pattern機種同失速類機種嘅分別, 好難講得出o個種唔同嘅操控方法, 需要自己親身體會...

跟住三個Flights, 練習好耐都無做過嘅Patterns, 有少少生疏...
好耐未試過緊張到出手汗, 同玩EPP機相比, 完全係兩回事...

漸漸由微風轉為無風, 自己亦已Warm Up完成, 做動作得心應手...

Edge 540T 10e真係好掂, 雖然相比其他10e係比較難操控, 但呢架Edge 540T可以交足功課, 完全跟到操控者嘅反應, 個人覺得非常滿意...
唯一缺點係Wing Load稍大, 不過對玩Pattern嚟講, 機重慣性大, 某程度上會仲好...

個Hyperion HP-Z3007-26馬大充足, 半雞平飛...
稍稍推油門至七成, 迅速垂直爬升...
Knife Edge Circle無問題...
如果再加大油門, 架機直頭想做Knife Edge Loop...

由於Wing Load大, Landing會難少少...
如果Final Approach收油門太多, 機速太慢, 好易會Stall...
整日7個Flights, 只有一次Landing係完美...

架Ultima EPP SOV嘅Rudder及Elevator虛位好多, 終於忍唔住, 星期六去咗雷記買咗兩隻Futaba S3156 Digital Metal Gear Servos...

原裝有三款Servo Horn, 最長o個款比Futaba S3110個十字Horn多一個窿, 約長多0.5cm...
Futaba嘅Servo Horn好抵用, $10唔駛有兩隻, 買多一兩包做Spare, 剪錯都唔會肉赤...

至於Metal Gear Set, 大約$85, 包一粒大啤令, 可以接受...

返到屋企試一試, 好似幾好, 無虛位...
反應亦相當唔錯, 推桿郁少少, Servo已經有準確順滑反應...

另外, 喺雷記買咗一包Control Horn, 用嚟改裝Elevator及Rudder...

已經諗到太約會點改, 實行時先至繼續改良, 諗多幾日先...

近呢一個月晚晚掛住睇24, 實在太緊張, 欲罷不能...
昨晚已經開始Day 6, 好大可能追得上美國月底開始嘅Day 7...
Jack Bauer, Go Go Go!!!

由於工作上需要, 身邊經常被6至7部PCs或Notebooks圍住自己...
屋企亦有5部電腦, 每部都有唔同嘅用途...

當電腦數量多嘅時候, Web Bookmarks就會放到亂哂龍, 好多時都唔記得Save咗喺邊部電腦...
後來用Xdrive去做儲存, 但Xdrive個Interface實在太慢, 慢到唔想用...

近排需要對Firefox 3進行兼容性測試, 唔覺意搵到一個Extension叫做Foxmarks, 可以儲存Bookmarks到Foxmarks嘅Server, 而啲Bookmarks可以自動Synchronize到每部機嘅Firefox...
如果有需有, Passwords可以儲存及同步, 中文繁簡字體亦無問題...
Foxmarks嘅Web Interface可以Dump一個Backup做Local Archive, 亦可以設定唔同嘅Profiles畀唔同工作用途嘅電腦...

呢個免費Add-on好好用, 解決呢個一直存在嘅問題, 所以我自己亦開始轉用Firefox, 反正速度上同IE差不多...

如果對用Firefox不存好感的話, 咁就暫時無辦法...