為咗養螯蝦, 星期六朝早洗咗個鯛缸, 洗埋火山石, 用一半舊水, 再加一半儲備缸水...
下午到魚街搜尋, 去到一間樓上鋪, 有幾缸螯蝦, 立即被一缸佛羅里達藍螯蝦吸引, 考慮咗一陣, 搵老闆幫我揀...
老闆好Nice, 拎隻螯蝦出嚟翻轉, 教我點分公姆, 但係隻螯蝦咁細, 我就分唔到...

返到屋企, 對水三個多鐘...
入缸後一粒鐘, 母螯蝦脫殼...
當晚公螯蝦亦開始進食, 果然係粗生粗養...

翻查資料, 發覺買錯咗螯蝦...
原本想買迷螯, 但買咗正常螯蝦...
佛羅里達藍螯蝦身長可達12cm, 咁大隻螯蝦, 我覺得係幾恐佈...
如果佢哋唔死, 養到5cm以上就要賣咗佢哋, 接受唔到咁大隻...

前幾晚係屋企有時間, 上網Bid咗隻"精選極厚白全包頭白鬚全白身麻呂白軀紅水晶蝦", 個名咁鬼長, 記都記唔到...
昨日完成交收, 同賣主要多一隻異性同Grade, 帶埋佢哋去做Gym, 再返屋企對水...

隻蝦色水好好, 夠厚白, 但身型仲係好細, 雖然貴少少, 但都值得...
另一隻紅色淡啲, 都係厚白, 希望可以開枝散葉...

準備開多個水晶蝦缸, 想買ADA缸, 不過唔知有無貨...
設備跟番依家o個個, 都係三層唔同嘅ADA泥加EDEN 501濾筒...
今晚收工去魚街睇缸、買泥及濾筒, 準備星期六動工...

至於架Ultima EPP SOV, 完成咗七成, 差推桿未搞, 其他主要部份已經搞掂...
日日都咁大風, 無哂心情整機, 寧願搞啲蝦好過...
如果繼續大風, 可能要去將軍澳工業村, 轉星期六早上玩, 星期日可以瞓多啲...

上星期四晚開始喉嚨痛, 第二日傷風流鼻水加咳, 放工即刻走去睇醫生...

做Contract Staff最唔好就係唔捨得放假, 就算病到半死都要捱返公司, 仲要等到收工先至可以睇醫生...

身邊嘅Permanent Staff, 一個月內, 總有一兩日病假, 少少頭痛腳痛又話唔番工...
假期又多, 個個都有百幾日假喺手, 加上平時Training Course又多, 有時一個星期都唔知見唔見到三日, 搵佢哋幫手做嘢都要夾時間, 所以經常畀市民大衆鬧工作效率低做係咁解...

做咗咁多年, 到依家已經做到無哂Heart...
加上個無乜腦嘅老板個老板, 為求上位坐正, 經常無風起浪, 成日以為自己有十萬兵力, 唔理下屬嘅死活, 完全無作為SSM應有嘅風範, 又話下屬無士氣, 其實咪係佢搞到大家無士氣, 啲兄弟依家夠鐘收工即走, 無佢咁好氣...
我個醒目老板已經明刀明槍擋咗佢老板好多次, 不過有時都擋唔到, 最後又落到我身上, 我無奈要啲兄弟硬食, 好希虛...

病咗幾日, 想整架Ultima EPP SOV都有心無力...
今個星期三終於重新動工, 換番Futaba R146iP及Waypoint W-060BB落GeeBee EPP BX, 留番Futaba R617FS及Futaba S3110畀Ultima SOV, 希望Keep住整, 可以下星期試飛...

近排好似經常幾大風, 朝早返工已經吹得好勁...
咁大風, 無乜心機去玩飛機, 勉强飛都無癮...

昨日同Billy傾開養蝦, 中咗螯蝦毒...
缸紅水晶已經去到50幾隻, 好擠迫, 想加高Grade蝦都唔得...
如果開個18"缸, 要再加濾筒及水泠, 依家經濟咁差, 唔化算...

屋企有12"空缸, 打算買返一對迷螯試試, 用番養鯛嘅設備就可以...
據聞螯蝦比紅水晶粗生, 但要散就難少少...
聽日有時間要洗缸, 養定水, 希望下星期搵到有漁友出售迷螯...

上星期去咗銅鑼灣Nokia睇藍芽耳機, Nokia啲款實在接受唔到...
去Sony Style望望, 原來香港無入Sony Ericsson DS205, 但網上面又好似話先達有行貨, 不過都無所謂, 反正台灣有人話同E66唔夾...

再三研究, 轉移目標去Sony BT15, 網評話啲聲靚, 特別版有入耳式耳筒, 差在無收音機功能...
我絕少聽電台廣播, 所以BT15係可以接受...

隔日到旺角睇睇, 問咗幾間價錢, 最後喺衛訊購入...

一直都擔心藍芽耳機同E66嘅配搭問題, 番到屋企立即試...
好彩所有功能都用到, 又無斷線或唔順, 放下心頭大石...
比起以前對Cheap Cheap鐵三角CK5, EX85較好聲, 起碼有番啲Bass...

近排行路行得多, 搵手機及耳機, 已經用咗唔少腳骨力...
一星期內仲入咗元朗兩次食B仔涼粉, 行到想死...
隻腳又開始痛, 睇嚟又要休息番一排...

E66都幾好用, 星期日去完青松觀, 搭輕鐵入元朗, 用GPS, 睇地圖跟住走, 幾過癮, 不過實際上用途不大...

放工番屋企搭地鐵途中, 可以上網睇新聞或資料, 資訊爆膨症又發作, 其實對身心都唔係一件好事, 應該留番少少時間, 等個腦休息吓, 或者諗吓其他嘢...

近幾日搵咗幾個有用Software, 用嚟睇eBook及儲資料...
部公司機Palm Tungsten T已經用咗5年半, 估唔到可以捱到咁耐, 仲係無穿無爛...
依家可以將工作資料慢慢轉去E66, 加埋個Encryption Software, 用BlowFish及MD5加密, 跌咗電話都唔怕資料遺失...

依家金融海嘯, 身家亦都減咗唔少, 每個月儲嘅錢就好似掟落個井到, 唔知幾時先可以浮番上嚟, 估計一兩年之內都應該番唔到身...
今日新聞報導玩具業已經受到波及, 遲啲鐘錶及其他行業亦會錄逐出事...
已經開始進入好似三十年代嘅經濟大簫條, 應該要開始作好準備...

原本打算下年去日本北海道自駕遊, 依家情況咁差, 唯有將計畫延遲...

架Ultima EPP SOV自從上星期三之後, 就再無整過, 反轉瞓咗喺枱面休息...

成個星期, 研究換手提電話...

自從好多年前開始用Nokia 6110, 對Nokia呢個品牌一直都好有信心...
同相機一樣, 對Nikon及Nokia係死梗派...

手提電話對自己嚟講, 電話只係一個電話, 其他功能都唔會用, 所以一直都係用得基本功能嘅電話, 而且好少轉款...
自6110之後, 到8210, 8310及6020, 每個都可以用到兩年以上...

8210游咗幾次水, 終於捱到壞先至換...

8310用咗兩年, 後來因為無藍芽免提耳機, 揸車唔方便, 所以轉6020...

6020一用就用咗三年, 到依家完全無壞嘅跡象...

近排無無聊聊睇吓啲新電話, 諗住轉吓款...
其實都有啲基本要求, 最好可以上到網做Web Browsing, 方便隨時搵資料...

開頭只係睇啲基本功能嘅3G電話, Nokia啲電話都幾多, 花多眼亂...
最後睇中兩款, 5610 XpressMusic及N81...
其中N81雖然係舊款, 但功能有我想要嘅GPRS及Wi-Fi...

由於某啲原因, 一定要用數記上台, 所以打算用上台出機優惠價購買...

出到旺角, 原來數記已經無賣N81好耐, 而且從其他店鋪睇過N81, 覺得實物麻麻地, 所以放棄...
5610 XpressMusicM無Wi-Fi, 所以亦被淘汱...

數記個Internet on Mobile, 支援HSDPA, 既然將會揀呢個增值服務, 無理由唔買個3.5G電話...

番到屋企再上網睇睇, 覺得E66係首選, 雖然比預期貴少少, 但外表靚仔, 又薄又係推滑式, 加上Wi-Fi及HSDPA功能, 完全附合自己嘅要求...
至於GPS功能, 個人嚟講就無乜用, 喺香港行街應該唔會蕩失路...

幾千元買個電話, 我覺得係貴, 但預計可以用到三年以上, 而且Wi-Fi會愈來愈普及, 所以花多少少買E66都可以接受...

最後決定星期五入手, 同時再出多部6210 Navigator畀另一半...

6210 Navigator行Symbian S60 3rd Edition Feature Pack 2, 多嘢玩過E66個FP1, 不過E66要求穩定性多過玩樂牲, 我自己都係用多過玩, 所以無乜所謂...

用咗幾日, 感覺良好, 未有投訴...
未有機會試GPS, 遲啲去啟德試試...

原裝個免提耳機音質麻麻, 依家搵o緊個藍芽免提, 可以插番個鐵三角耳機...

Nokia啲藍芽免提耳機好樣衰, i.Tech嘅產品又好似好兒戲...
Sony Ericsson個DS205好似幾好, 只係擔心同E66嘅兼容性...
Motorola有隻S605, 無DS205咁靚仔, 不過網評好似唔錯...

要繼續做資料搜集, 架Ultima EPP SOV都係等佢瞓吓先...

近排覺得幾疲累, 提唔起勁晨早去玩飛機, 休息一星期...

其實飛機只係自己生活嘅一部份, 比重多與少, 隨不同時間而轉變...

坐喺屋企, 乜都唔想做, 連打機嘅興趣都無...
之前買落嘅Metal Solid Gear 4, 玩咗一版又停咗落嚟...

想買Gran Turismo 5 Prologue好耐, 但又想等正式版...
後來得知正式版可能要等到2010, 索性唔再等, 直接喺PLAYSTATION Network畀錢Download落PS3算數...

質量果然有信心保證, 1080p加5.1音響, 好正...
尤其係駕駛室內View Mode, 好有真實感, 以往玩賽車Game, 好少用呢個View Mode, 不過今次唔用唔得...
諗過買埋個Logitech G25賽車方向盤, 不過屋企無位裝, 所以放棄呢個念頭...

無出去玩飛機, 留喺屋企整Ultima EPP SOV...
由於有之前兩架EPP機嘅經驗, 說明書都唔駛睇...
不過覺得整到好膩, 連整機嘅興趣都唔係好大, 整一陣停一陣...

到現時為止, 所有翼面已經搞掂, 準備開始裝Servos...
另外, 都可能要再買多個30A電子變速及Futaba R617FS...

如無意外, 下星期可以試飛, 不過都要睇下有無心情繼續整...