兩星期前, 同Bronney一齊去啟德, 佢飛WingDragon, 我飛GeeBee EPP BX...

當日Bronney帶咗Nikon D40X加Nikon Nikkor 70-300mm f/4.0-5.6G, 幫我架GeeBee影相...

呢輯相影得非常好, 尤其喜歡Knife Edge及獅山下o個兩張...

Knife Edge張相, 架GeeBee同地面成90度低位飛行, 對焦非常準確...









獅山下o個張相係我特別要求, 飛咗三次, 效果好好, 做Wallpaper就最啱...









Harrier張相都好正, 用長焦距鏡頭拍攝近主體, 用最大光圈, 背景被柔化, 特出主體...









另外一張個人較喜歡係「背影」, 雖然見唔到飛機, 不過頭部少少向上斜側, 身體成A字型, 明顯係正在集中精神控制架機, 加上柔化背景及黑色T-Shirt, 效果好好...









Bronney用手動對焦都可以做到咁準, 仲要係通頂無瞓過, 佩服, 佩服!!!

雖然鏡頭只係用70-300mm f/4.0-5.6G, 但配合DSLR, 加上Bronney嘅技術及創意, 我對呢輯相好滿意...

遲啲搵日好天氣, 就算辛苦啲, 都要拎埋部Nikon D70, 幫房仔架Ultima EPP SOV影番輯靚相...

不知不覺, 差唔多兩個月無飛, 上星期日天氣好, 加上微風, 非常適合飛行...

因為冬天將至, 日照時間短, 可以瞓多幾個字先至起身...

Bronney喺越秀廣場麥記等我, 原來佢整電腦搞通頂, 犀利...

GeeBee EPP BX裝備:
- Dualsky XM2826CA-15
- APC 10x3.8SF
- EMAX ESC-18A
- Futaba 146iP Rx
- Futaba S3110 Servo x 3
- Waypoint W-060BB x 1
- Dualsky 11.1V 850mAh 25C, Zeta-Plus 11.1V 1000mAh 20-25C

雖然無飛咁耐, 不過呢段時間都有繼續玩Simulator, 第一個Flight要將玩Sim感覺轉番做真實環境...

上次將Rudder Servo由Futaba S3110轉番做Waypoint W-060BB, 但個060BB有少少問題, 個中位有少少走位, 可能個大牙撻咗, 唔理咁多, 照飛可也, 不過做Hovering時, Rudder修正頻密少少...

Bronney架環球WingDragon終於出場, 但Aileron Servo接線有少少問題, 解決問題之後正式起飛...
第一次起飛失敗, Throttle EPA設定太少, 機速唔夠...
修正Throttle EPA, 順利起飛...
Bronney雖然無玩一年, 技術依然尚在, 操控自如...
飛咗兩個Flights, 盡興而回...

Bronney走咗之後, 剩低自己繼續練習, 開始轉吹大風, 急急腳飛完8個Flights, 夠哂皮...

架Ultima EPP SOV已經完成咗9成, 只差電池擺放位置要諗諗...
為求完美, Rudder推桿整咗三次先至收貨...
但由於機身係用EPP製造, 物料偏軟及彈性大, Servo較易移位...
Rudder最明顯, 用手指輕輕掂一掂, 都可以做成10度偏差...
雖然廠方建議Rudder及Elevator用Futaba S3156 Metal Gear Servo, 但我覺得分別不大...
寧願改用Hitec HS-65HB, 再改用大Control Horn...
不過65HB比S3156體積大好多, 改咗之後好難番轉頭, 都係用S3110試飛先...

幾星期前買咗個ADA Cube Garden 12", 返到屋企用部Casio Exilim EX-Z1050影相, 影咗兩張, 機後LCD出現綠色雜訊, 跟住部機就儍咗, 換電池之後都無反應, 鏡頭都唔識縮返入去...

上年買DC時, 原本選擇買Nikon Coolpix S200, 但Sales哥哥推介Casio Exilim EX-Z1050, 因為係Made In Japan, 心諗Mickey及阿輝都係用o緊Casio, 好似無大問題, 一於轉軚買Casio...
點知用唔夠年半, 就突然死忙...

手上o個兩部陳年Nikon Coolpix 885及Nikon Coopix 5400都仲係運作暢順, 估唔到部Casio Z1050咁鬼短命...

打電話去捷成問一問, 檢查費$100, 換鏡頭$1000以上...

上星期一收到ESDlife嘅Mail, 有部BenQ DC C1060做o緊$599, 個Specifications幾好, 有防手震及一笑即拍, 仲有Manual Mode, 好似幾好玩...
維修Casio Z1050唔係咁化算, 嬲嬲哋, 索性買部平價機粗用, 反正認真影相都會用Nikon D70...
二話不說, 立即落Order, 不過ESDlife個Website嘅設計就非常差勁, 好易會開咗幾個重覆嘅Web Browsers, 最後都係打電話落Order, 仲慳時間...

星期五收到貨, 外表質量一般, 以咁嘅價格, 已經當部機係玩具, 無要求...

星期日去啟德, 順手試機...

效果等同佢嘅價格, 好一般, 比手機影相當然好好多...

最大問題係Wide Angle時有明顯黑角, 以後影相要就一就...
至於其他功能, 暫時未有投訴...

上星期日房仔參加咗第三屆香港室內電動模型飛機比賽, 我就幫手做Caller...

我對比賽一向都無乜興趣, 返工已經咁大壓力, 唔想連放工時間都搞到咁緊張..
當年玩1/10 Touring Car都無参加, 阿輝就有參與幾場賽事...

當日9點去到警察體育遊樂會室內運動場, 房仔已經準備好試機...
房仔試咗三次機, 到10點鐘, 比賽準備開始...

我第一次做Caller, 房仔排位第一個比賽, 無得參考其他師兄, 手忙腳亂...

第二個Flight就好啲, 房仔嘅分數亦有所進步...

但第三個Flight嘅Free Style部份接觸地面, 非常可惜, 不過經驗無價...

今年賽員平均技術較去年好, 但超班高手欠奉...
大陸一位小朋友飛Twin Dragon控制得好好, 但無咗上年劉彩虹先生咁精彩嘅演出...
整體嚟講, 個人覺得今年嘅比賽係比較沉悶...

研究咗幾日, 大約諗到個蝦缸應該點樣罷設...

星期六去魚街搵合適嘅沉木, 搵到一舊Nike型, 價錢幾貴, 不過沉木可以用過世...

開頭睇到啲台灣火山石, 諗諗吓, 都係買番PowerHouse火山石穩陣啲, 起碼聲稱唔會影響pH及GH...
加埋Billy畀我o個舊白倉貴氏鈣鎂礦石及之前買落嘅太古海泥石, 應該足夠...

再買珊瑚莫絲、黑木蕨及稻穗...

返到屋企, 又玩煲老火湯, 舊沉木足足煲咗兩日...
珊瑚莫絲及珍珠三角莫絲分別紥上兩舊沉木, 又用咗幾粒鐘...

最後星期日晚終於完成罷設, 等待莫絲生長成景...

再放幾隻藍蝦做死士, 到昨晚為止, 都尚健在...
要Keep住睇pH, GH及NO3, 到讀數穩定先至挑選水晶蝦移居新缸...

另外, 枝pH Pen傻傻哋, 讀數唔準, 又要去魚街買調較液...

至於o個兩隻佛羅里達藍螯蝦, 大得好快, 尤其係隻母蝦, 已經身長5cm...
啲鐵皇冠及水榕畀佢哋兩隻o野剪到斷哂, 沉木都可以被夾到見到鋸齒印...
有時我會放枝水草鉗入缸, 同佢哋搏鬥, 好過癮...

决定開新缸後, 上星期五收工後立即到魚街...

去到大黑店, 問一問老板娘, ADA Cube Garden 12"方缸無貨, 得番Do!Aqua呢條Line, 價錢仲平到嚇一跳, 質量可能比其他中國貨好少少...
跟手去水草店, 竟然見到日本製ADA 12"方缸, 價錢就當然比大陸缸貴幾倍...
ADA用4mm玻璃, 大陸缸用2分, 玻璃厚度會影響折射效果, 蝦會影得無咁Sharp, 就係因為呢個原因, 決定買ADA...
原來水草店已剩番最後一個, 可能係成條魚街最後一個...
之後生產嘅ADA Cube Garden會由大陸製做, 但會轉用白玻璃...
至於其他價值幾千元以上嘅ADA缸, 唔知會唔會都係大陸做...

當日急急腳買咗1包1L ADA黑泥, 1包1L ADA II黑泥及2包1L ADA幼黑泥...
另外, Alan介紹用Totto生物環, 儲菌面績比PowerHouse更多, 而且可以壓制pH上升云云, 買咗1L試試...
再落卡奇買Eden 501濾筒...
拎住個缸, 泥及濾筒, 重到死, 又唔可以搭巴士, 只能搭地鐵, 放工時間好鬼多人, 幾驚會整爆個缸, 整傷其他人就唔係幾好...

星期六朝早清洗兩個舊鯛缸, 遲啲放喺書枱底放雜物, 話唔定有朝一日會重出江湖...

個ADA缸無跟發泡膠墊底, 要自己界一塊...

當鋪咗1L ADA黑泥及1包1L ADA II黑泥後, 覺得唔係好夠泥, 立即衝去魚街買多袋3L ADA II黑泥, 順手買舊細沉木, TDC Bio Culture 1000及太古海泥石...
返到屋企, 加多2L ADA II黑泥, 覺得已經差唔多, 最後加埋2L ADA幼黑泥, 總共2吋泥有多...

慢慢加滿水, 抽乾後再加滿, 當洗泥一次...

最後設置個Eden 501濾筒, 加埋BIO DIGEST活性硝化菌, 及注射Bio Culture 1000入泥底, 整到夜晚12點幾, 搞足一日...

星期日換半缸水, 仲有煲沉木...

諗吓諗吓, 想加燈畀個ADA缸...
最理想係用T8管, 因為ADA及KSS有專用光管畀蝦及草, 但好難搵到燈罩畀12"細缸...
後來畀Sam提醒, 索性買個24"燈罩橫跨兩個蝦缸, 其餘三個缸就用番個舊T5 6700K 14W管x2...

星期一收工又去魚街, 買咗個Dazs T-8 SuperLight 20Wx2, 加埋KSS 12000K 20形 18W管及ADA NA-LAMP 20W管, 呢個配搭, 照蝦又得, 照草都得...
其實最理想係用三枝T8管, 不過搵唔到三管燈罩, 遲啲Upgrade再算...

一不做, 二不休, 加多個Eden 501, 用Totto生物環...

返到屋企搞咗個濾筒先, 串聯兩個Eden 501, 淨係開著駁出水位o個個, 出水明顯慢咗, 但可以接受...

套燈都幾掂, 光度好足夠, KSS 12000K明顯較ADA NA-LAMP藍少少, 啲蝦照出嚟較以前亮白, 貴啲都係物有所值...

依家等緊個硝化系統成熟, 睇怕都要三個星期以上...
如果下星期水清, 會落一隻蝦試水做死士...

星期六買o個舊沉木足足煲咗六個鐘, 仲耐過煲老火湯...
鋪咗少少珊瑚莫絲喺舊沉木面, 加埋舊新買嘅美國鳳凰苔火山石, 一齊放咗入新缸...
有兩塊南美珍珠三角莫絲, 暫時放喺泥面, 遲啲應該會鋪上沉木...

呢兩日諗緊蝦缸造景, 個缸咁細, 要做到有主題及層次感, 又要適合水晶蝦繁殖, 都幾頭痛, 最大問題係自知造景唔掂...
打算今個星期六再去魚街搵吓有無合適嘅草、石及沉木...

前日得知Billy擁有Arctica Mini水冷, 呢個水冷貴過我全套新蝦缸...
希望下年有啲新款式設計畀細缸用, 等啲蝦無咁辛苦...

成個星期都集中精神處理個蝦缸, 架Ultima EPP SOV真係可憐, 被冷落一角...