昨日有雷暴警告, 急急腳到啟德試經過大修嘅Zero, 主要想試用唔同槳嘅效果...

到達後天氣尚算OK, 一大片灰雲, 無雨落, 微風, 不過好悶熱, 啲汗係咁流...

Zero裝備:
- EMAX BL2215/20 1260KV
- EP8060, APC8.5x5E(10x5E改), APC 8x8E
- Otter BS25A ESC
- Futaba 156F Rx
- Zeta-Plus 11.1V 1800mAh 16-20C
- 飛行重量 559g

第一個Flight用EP8060, 速度同推力都算OK, 但感覺上無HD8060咁爽...
架機平飛反飛時無上次咁定, 要不時稍為修正...
打Loop就一如以往, 唔係好正...
跟住再試Stall Turn, 落嚟嗰吓唔係好定, 唔敢再加Roll...
再嚟多次Stall Turn, 今次死喇, Turn完後架機唔係好受控, 跟住就失速縲旋, 不過好彩落咗係一堆比我仲高嘅植物上面, 完整無缺...

跟住諗仲有少少電尾, 不如試吓隻APC 10x5E改短嘅8.5x5E, 飛多兩分鐘...
度電流後, Full Throttle要19A, 半雞9A左右, 可以接受...
升空後, 可能由於槳形唔同, 雖然Pitch比EP8060細, 但速度比EP8060仲快...
降落時用順風, 速度好快, 眨吓眼已經飛過咗降落區, 第一次嘗試降落失敗...
飛番轉頭再嘗試降落, 今次高度適中, 但速度仲係稍快, 到達降落區時, 推上Elevator, 將架機「檗」落草堆做Hard Landing, 草堆夠厚, 架機無事...

第三個Flight用APC 8x8E, Full Throttle要22A左右, 半雞11A左右, 接近極限...
速度果然好快, 但架機唔係好定, 我只敢用40% Throttle...
打Roll當然無問題...
可能機身經過上次大抄後有啲Twist, 打Loop就有啲勉强...
再做一個Stall Turn, Turn完後又再一次失速縲旋, 今次無咁好彩, 雖然係跌落草堆, 但唔夠厚, 摩打芯彎咗, 機身有一條大裂縫, 不過機頭完整, 只係Motor Mount裂開...
睇嚟主翼同尾翼唔平行對做Loop同Stall Turn都有幾大影響...

正當研究緊架機嘅損傷時, 聽到幾吓車喇叭聲, 回頭一望, 見到兩位阿Sir喺鐵絲網外揮手, 心知不妙...
行到去阿Sir嗰到時, 見到兩架鐵馬同航空青年團架車...
阿Sir叫咗航空青年團啲人落車, 航空青年團有4個人落咗車, 阿Sir跟住同我講話航空青年團係同地政署租用咗機場跑道一塊地, 而我哋無租到, 所以我哋唔應該喺嗰到玩, 而且我哋可能會Jam到航空青年團啲機云云...
阿Sir叫我哋盡快離開, 跟住抄低咗我嘅身份證, 阿Sir仲好有趣咁提議我去大澳玩, 我即刻話"咁遠, 點去呀!", 阿Sir就話"咁又係", 真係啋佢都傻...
航空青年團柯生跟住就叫阿Sir揾阿Ben同阿華, 佢哋坐喺車屎地嗰邊...
我同房仔唯有執嘢走人, 途經阿Ben佢哋, 佢同阿華都好㷫, 阿Ben仲即刻打俾柯生質問點解報警, 最後當然係無結果喇...

其實上星期日阿Sir已經揸車嚟過一次, 不過無落車, 房仔話佢哋淨係用大聲公叫我哋唔好玩飛機, 我就喺石屎地玩緊Edge 540T, 聽唔到, 不過我哋都無理到, 繼續玩...

睇嚟將來都係要喺星期六玩或另覓場地...