星期日下午收到阿輝電話, 原來將軍澳工業村出咗事...

據阿輝講, 有一架大油直撞到一位師傅, 佢見到師傅受傷後即時報警救助...
雖然佢見唔到事發經過, 但警察叫佢驗証傷者...

阿輝話師傅傷得幾嚴重, 面部見骨, 輝個朋友就見到傷及腦部...

據聞師傅經過手術後, 嘗未甦醒...
希望傷者可以吉人天相...

唔好話我黑心, 我相信呢種意外一定會出現, 只係時間、地點、人物、受傷情度有所不同...

之前已經聽過好多機友講話有部份電直/油直會喺頭頂或接近人群位置做動作, 雖然親眼未見過, 但諗起都覺得危險...
新聞報導亦見到幾架電直/油直在同一範圍遊走, 睇落都好似好近, 不過可能係長鏡頭壓縮咗影像都未定...

不過親身試過有機友喺我坐身邊唔到十呎做Hovering, 雖然唔係大動作, 但意外嘅嘢, 無人估到幾時會發生...
機友肯定相信自己嘅技術, 但我無理由信任佢, 要將性命交俾佢...
萬一Jamming或失手做錯動作, 無人會預計到有乜嘢後果...

自此之後, 我都盡量避免同直升機同場, 因為如果有太多顧慮, 玩都玩得唔開心...
我寧願靜靜地, 同幾個飛機機友, 專心練習, 努力改進技術...